想知香港邊度有又抵又高質嘅狂歡時段？睇吓我哋精選嘅 Happy Hour 酒吧推介。
想放工後相約好友或者同事小酌一番，一齊減吓壓？望望我哋推薦嘅呢啲香港熱門卡拉OK酒吧、現場音樂表演場地同棟篤笑啦。而如果你純粹想同朋友坐低傾計嘅話，咁就千祈唔好錯過以下餐廳同酒吧嘅優質 Happy Hour 狂歡時段啦！
搵緊香港 Happy Hour？睇吓以下嘅飲酒好去處
1. Lost Stars Livehouse Bar & Eatery
搬咗去尖沙咀嘅 Lost Stars，依然係我哋心愛嘅現場音樂場所之一。更正嘅係，Lost Stars 有價錢實惠嘅 happy hour，由下午4點開始就會以超值價錢供應葡萄酒同啤酒，起價只需要$40。不過，記得要早啲入座，因為下午5點開始，嘢飲就會改為$50起，下午6點就會係$60起。
Lost Stars Livehouse Bar & Eatery：尖沙咀河內道18號K11購物藝術館2樓222A號舖，電話：2455 8593
2. Call Me Al
座落於西營盤嘅 Call Me Al，係我哋收工後同同事一齊飲杯嘅理想場所。酒吧嘅狂歡時段每日由下午5點至7點提供，畀你以$70起享用雞尾酒，$50起享用啤酒，同$60起享用烈酒和葡萄酒。如果肚餓，我哋私心推薦 Call Me Al 嘅酒吧小食——熱辣辣嘅薯角襯酒一流！
Call Me Al：上環皇后大道西123號地舖
3. Honky Tonks Tavern
喺蘇豪某個唔起眼嘅角落，一場 party 正等緊你！每日下午5點至7點，Honky Tonks Tavern 都會推出特價烈酒同葡萄酒（$65）同新鮮出爐嘅 pizza ($30），畀你邊飲邊食。而為咗慰勞各位打工仔，每個星期三更加係全日都實行 happy hour 優惠，幫你趕走 mid-week blues！
Honky Tonks Tavern：中環荷李活道75號地舖
4. Funky Monkey
Funky Monkey 係我哋去諾士佛臺嘅必經酒吧，亦都係香港最著名嘅 tiki 酒吧之一，係一個充滿異國風情嘅飲酒勝地。雖然 Funky Monkey 嘅兩間分店都有唔同嘅優惠，但佢哋嘅 happy hour 優惠一樣都係買一送一。
Funky Monkey 喺佐敦同尖沙咀都有分店。
5. The Baker and the Bottleman
相信唔少人都已經對 The Baker and the Bottleman 嘅麵包十分之熟悉，但係你又知唔知佢哋嘅紅白酒亦都飽受全港品酒粉絲嘅歡迎呢？你可以喺 happy hour 嘅時候享用折扣食品同飲品。小食起價為 $30，飲料起價為 $70，其中包括雞尾酒、招牌葡萄酒同啤酒。
The Baker and the Bottleman：灣仔皇后大道東200號利東街地下G14&G15號舖
6. Tempo Tempo
喺 office 坐到閉翳？去 The Sixteenth 嘅露天酒台 Tempo Tempo 歎杯清涼嘅 cocktail 啦！呢度下午3點至7點半都係歡樂時光，提供氣泡酒、葡萄酒同雞尾酒，起價都只係$68。再配上 Tempo Tempo 嘅意式小食、冷盤、迷你 pizza、甜品等，仲有寬闊嘅戶外空間，氣氛肯定一流。
Tempo Tempo：鰂魚涌英皇道979號太古坊濠豐大廈2樓 The Sixteenth，電話：2788 3037
7. The Stage
位於和昌大押嘅 The Stage 最適合鐘意邊打卡，邊飲酒嘅朋友。每星期二至五下午3點至7點，你可以享受呢度嘅 1+1 Happy Hour 優惠，以一杯嘢飲嘅價錢享用兩杯，其中包括 $128 嘅雞尾酒同$138 嘅烈酒，千祈唔好錯過呀！
The Stage：灣仔莊士敦道60-66號2樓，電話：3594 6302
8. Casa Cucina
搵緊喺銅鑼灣嘅 happy hour？可以去西班牙餐廳 Casa Cucina。呢度每日下午3點到6點，由$48起，你就可以享用精選雞尾酒、無酒精雞尾酒、茶同咖啡。飲嘢之餘，記得試下佢哋嘅味噌炸蝦同意式奶涷，配酒唔錯㗎。
Casa Cucina：銅鑼灣百德新街59-65號 Fashion Walk 地下C同D號舖，電話：2152 0556
9. Ask for Alonzo
喺港島返工嘅你，放工之後不妨去 Ask for Alonzo。呢間酒吧每日3點到8點都係歡樂時光，$38起就已經可以試到葡萄酒、prosecco 等，啱晒各位長期糧尾。
Ask for Alonzo 喺港島有幾間分店。
10. Yurakucho（有樂町）
想喺有日本居酒屋風味嘅酒吧歎歡樂時光，不妨試試有樂町！逢星期一至六，下午 5 點至 7 點同埋晚上 10 點至凌晨 12 點，你都可以享用 YFC Happy Hour 優惠。只需要 $60，你就已經可以一嚐到佢哋嘅 highball 雞尾酒、葡萄酒、或者小食。咁抵玩，一於嗌勻晒佢，慢慢嘆！
Yurakucho：中環雲咸街43-55號余悅禮行地舖，電話：2663 0068
11. Emmer Pizzeria & Cafe
雖然呢間披薩店平時價位好似高啲，但係你知唔知道佢哋嘅 happy hour CP 值極高呢？下午4點至8點間，飲品酒水只由$48起。如果想以 Emmer 嘅手功 pizza 配埋啤酒，加加埋埋都只係$180左右！可以喺太古廣場用呢個價錢喺露天餐廳歎酒，認真超值！
Emmer Pizzeria & Cafe：金鐘金鐘道88號太古廣場L4樓407號舖，電話：2780 1110
12. Hugger Mugger
你有冇留意到雲咸街上有一道紅色但係唔太起眼嘅門呢？穿過呢道門，你就會到達英式地下酒吧 Hugger Mugger 喇！佢哋嘅 happy hour 絕對不容錯過。每日下午 5點至8點，你可以以$48起享用葡萄酒、烈酒同啤酒，而雞尾酒亦都只係$55起。各位夜貓落老蘭 party 之前，不妨喺星期四到星期六夜晚9 點至11點嚟飲一杯，因為嗰陣有額外嘅狂歡時段呀！
Hugger Mugger：中環雲咸街43-45號地庫，電話：2362 8988
13. The Mansion
中環酒吧 The Mansion 由星期三到星期六下午5點到9點都提供 happy hour 優惠，只需要$80就可以暢飲精選葡萄酒、烈酒同啤酒。喺正中環都有咁抵嘅優惠，千祈唔好錯過呀！
The Mansion：中環雲咸街77號嘉兆商業大廈地下G號舖，電話：5464 0002
14. Boticario Bar & Grill
有咩正得過美酒配靚景？位於尖東海傍嘅 Boticario Bar & Grill 歡迎你放飯或者放工之後嚟嘆返夠本！每日下午12點至7點，你可以喺度享受飲品買一送一嘅優惠。喺 Boticario 寬敞嘅露台上飲杯治癒嘅雞尾酒，順便 feel 吓舒適嘅海風～
Boticario Bar & Grill：尖沙咀麼地道66號尖沙咀中心地下5號舖及UG樓15號舖，電話：2765 0800
15. The Pontiac
位於大館隔離嘅 The Pontiac，Ponty Hour 每日由4點到7點。只需要$88就可以享用啤酒、紅白酒等，而 Negroni 同 Daiquiri 等等嘅特色雞尾酒都只係$55咋，仲要有質素保證添！加上呢度嘅酒保非常之好客健談，酒吧氣氛亦都與眾不同，喺中環地段有咁抵嘅 happy hour，喺邊度搵丫～
想了解更多，參考我哋嘅 The Pontiac 評論（英文版）。
The Pontiac，中環蘇豪奧卑利街13號，電話：2521 3855
16. Foxglove
Foxglove 係一間充滿氣質嘅別緻小酒館，亦係我地喺香港最愛嘅聚腳點之一。呢度嘅復古氣氛，現場音樂，點心同歡樂時光折扣都非常吸引：$60 就可以買到紅酒、白酒、精釀啤酒、或一系列烈酒，而$100 更加可以畀你飲到精選雞尾酒。平日下午 5 點至 7 點，記得嚟 Foxglove 放鬆下喇。
Foxglove：中環都爹利街6號印刷行2樓，電話，2116 8949
17. The Dispensary
呢間酒吧係一個 happy hour 隱世好去處！The Dispensary 位於大館 Cantina 同 The Chinese Library 之間，每日下午3點至7點提供歡樂時光優惠 —— $100嘅雞尾酒，仲有$65嘅啤酒同葡萄酒。逢星期五下午5點至7點，你甚至可以用$100就可以享用無限量酒吧小食，分分鐘唔使食夜晚飯嚕！
The Dispensary：中環荷李活道10號大館1座1樓1號舖，電話：2848 3000
18. The Praya
每日下午3點至7點，你都可以喺 The Praya 以優惠價格品嚐脆皮蝦豬肉餛飩等酒吧小食。而 happy hour 梗係唔少得酒啦，所以記得唔好錯過 The Praya 嘅招牌同各式經典雞尾酒，以及一系列嘅精選嘅葡萄酒。喺 IG 追蹤 The Praya，仲可以以$10超抵價換購一杯 welcome drink 添！
The Praya：西環石塘咀干諾道西181 One-Eight-One 酒店3樓
19. Cadillac Bar & Grill
計我哋話：食墨西哥嘢，一定要配杯 Margarita！Cadillac Bar & Grill 平日3點半至7點半都係 happy hour，可以用折扣價享受精選飲品，其中當然唔少得出名嘅 Margarita 啦，鹹鹹甜甜，超易入口，簡直致命呀！
Cadillac Bar & Grill：銅鑼灣軒尼斯道500號希慎廣場7樓718-719號舖，電話：2521 2322
20. Frites
放工返屋企途中想飲杯啤酒解吓熱？Frites 就係你嘅最佳拍檔。呢間比利時酒吧逢星期一至五3點到8點都會提供歡樂時光優惠，俾鋸排嘅顧客可以以半價享用瓶裝啤酒、手工啤、葡萄酒、烈酒等，填飽個肚之餘仲可以抵抵哋嘆返杯。
Frites 喺全港都有分店。
21. The Optimist
好客嘅職員、高雅嘅裝潢、一流嘅飲品…… 呢度有齊晒！位於灣仔嘅 The Optimist 提供高質嘅歡樂時光，每日3點到7點半都係 The Optimistic Hour，$48起就可以享用各種葡萄酒、雞尾酒同啤酒，再以佢哋用西班牙辣椒製作的各種招牌菜式配酒，真係一個完美嘅體驗。
The Optimist，灣仔軒尼詩道239號地下至2樓，電話： 2433 3324
22. Mr Wolf
講起中環 happy hour，點少得 Mr Wolf？只需要$50起，你就可以喺舒服嘅戶外用餐區品嚐 Mr Wolf 嘅啤酒、雞尾酒、招牌葡萄酒或烈酒，係放工好去處。
Mr Wolf：中環皇后大道70號卡佛大廈5樓，電話：25260838
[本文原於2020年10月出版，並於2024年由李綺婷更新。]
