想喺香港搵間有靚景嘅餐廳飽覽城市景色？以下嘅露天餐廳都有露台或者陽台，俾大家可以喺晴朗嘅一天好好享受新鮮空氣之餘，食返餐正嘅～
大家屈咗喺香港咁耐，相信已經去勻晒香港最優美嘅行山徑、露營熱點同寵物公園喇。如果你享受呢啲戶外活動，又係一個吃貨嘅話，以下嘅露台餐廳就一定可以滿足晒你所有願望。趁天氣未算太熱，而香港又終於放寬防疫限制之制，各位一於約埋親戚朋友，去香港唔同嘅戶外餐廳一齊享受美景佳餚啦！
香港露天餐廳全指南
1. 法國巴黎小館 (Café Claudel)
位於大館裡面嘅法國巴黎小館係我哋喺香港必去嘅戶外餐廳之一，因為呢度嘅露天位可以俾我哋欣賞到周圍華麗同充滿歷史性嘅建築。無論你係試緊呢間小館嘅 brunch、午餐、下午茶定係晚餐，你都會感覺自己好似身處喺30年代嘅巴黎咖啡廳一樣咁有 feel～
法國巴黎小館 (Café Claudel)，中環荷李活道10號大館 G08-01號舖，電話：2411 1310
2. Lounge Hakuba
同 The Alp 聯手合作嘅 Lounge Hakuba，喺銅鑼灣打造咗一個潮得嚟又舒服嘅露台空間。呢度日唞係咖啡廳同餐廳，夜晚就會搖身一變，成為食水煙同飲酒嘅聚腳點。我哋認為呢度係一個放鬆嘅好地方，特別適合一班朋友或者同事放工之後幫襯。嗌嘢飲嘅時候，大家亦都可以試下 Lounge Hakuba 送酒必備嘅日式小食。
Lounge Hakuba，銅鑼灣謝斐道535號 Tower 535 302號舖，電話：2111 1707
3. Pondi
法國菜你就食得多啦，但係「法印」fusion 大家又試過未呢？我哋絕對推薦各位去 Pondi 試試。Pondi 呢個名係由印度南部前法國殖民地 Pondicherry （本地治里）衍生嘅，而鑑於歷史，當地到而家都依然保留唔少殖民地風格嘅建築物同紀念公園，充滿法國風情。因此，Pondi 呢間餐廳就旨在以食物嘅形式喺香港表達同推廣本地治里嘅歷史，提供經典嘅法印美食，例如法式沙律配印度 chutney 同 papadum——聽落又好似唔錯喎……？！
Pondi，西營盤福壽里14號，電話：6113 0195
4. The Farmhouse 咖啡廳
喺陽光明媚嘅一天，喺 The Farmhouse 咖啡廳邊食 buffet 邊嘆個靚景…… 淨係諗吓都已經覺得正啦～呢間位於香港維港凱悅尚萃酒店嘅酒店餐廳喺早、午、晚都供應國際自助餐，包你食得飽！再加上佢哋特別引入有機蔬菜、可持續海產等等嘅優質食材嚟炮製每道美食，保證新鮮又健康。
The Farmhouse 咖啡廳，北角北角村里1號香港維港凱悅尚萃酒店西座2樓，電話：3896 9896
5. Sunset Grill
近年嚟，東涌呢一區一直慢慢發展，而家已經成為唔少時尚店舖同餐廳坐落嘅地方。位於香港東涌世茂喜來登酒店頂樓嘅就係熱點之一——Sunset Grill。呢間酒店餐廳除咗有開放式廚房提供超好味嘅炭燒同乾式熟成牛扒之外，仲有無可挑剔嘅五星級服務，唔怪得呢度係唔少「食肉獸」嘅天堂啦！而講起 Sunset Grill，又點可以唔提佢嘅美景呢？喺佢嘅室外露台度搵個位，一邊嗒杯 cocktail，一邊放眼望去遼闊嘅海面，簡直係一流嘅享受！
Sunset Grill，東涌怡東路9號香港東涌世茂喜來登酒店19樓，電話：2535 0025
6. La Rambla by Catalunya
想喺放工後或者週末相約同事朋友小酌一杯？位於 ifc mall 嘅 La Rambla 一定啱你哋。呢度唔單止交通方便，仲有個寬敞舒適嘅露台，俾大家欣賞到壯麗嘅城市景色之餘，仲可以品嚐到加泰羅尼亞式嘅各款美食。另外，La Rambla 逢星期一至五嘅晏晝3點到夜晚8點都係 happy hour，任大家飲得盡興！除咗 Steak Tartare Roll 同埋 Red Prawn Carpaccio 之外，唔好錯過佢其他嘅主食、下酒菜同小食呀。
La Rambla by Catalunya，中環金融街8號國際金融中心商場3樓3071-73號舖，電話：2661 1161
7. Feather & Bone（荃灣西）
現已佈滿全港嘅扒房兼凍肉店 Feather & Bone 喺荃灣西有間獨一無二嘅分店！呢間餐廳嘅特別之處就係佢喺店外有一個面向海面嘅露台，俾大家可以一路鋸扒一路 chill～無論你係經過想飲杯咖啡，定係坐低試試 Feather & Bone 嘅招牌漢堡包同牛油果多士，提提大家隨身帶返個環保袋，咁就可以順便買埋佢哋優質嘅凍肉同其他雜貨，準備炮製下一餐！
Feather & Bone（荃灣西），荃灣大河道100號海之戀商場地下 G09號舖，電話：2618 8160
