韓劇有云：雖然要見輔導但也沒關係！與其屈住屈住，不如試吓接受心理輔導，以溝通嚟處理內心嘅鬱結。我哋撐你㗎！
重要嘅嘢要講三次：心理健康同身體健康一樣咁重要。心理健康同身體健康一樣咁重要。心理健康同身體健康一樣咁重要！香港人出名壓力山大，而有時擼貓同嘆返個靚 spa 都唔一定解決得到心裏面嘅負面情緒——但係呢樣嘢其實非常之常見，我哋 Honeycombers 亦都希望藉住呢個平台，鼓勵大家公開討論心理健康。除咗可以喺我哋嘅英文網站上面睇睇有關心理健康嘅文章同分享之外，我哋亦都蒐集咗一啲喺香港提供心理諮詢、輔導同治療嘅可靠機構，俾大家參考。
喺香港提供心理輔導同諮詢嘅機構
1. The Greenstone Group
你係咪有時候會情緒低落、覺得倦怠，或者想法消極？唔好再自己一個掙扎喇！知道要好好生活，就要認真面對心理問題同煩惱。The Greenstone Group 會透過心理諮詢同輔導，為你提供合適嘅治療同日常支持。喺註冊諮詢師同受 ICF 認證嘅教練 Karen Chan 嘅引導下，你可以積極主動咁照顧自己嘅需求，實現你嘅個人或者工作目標。The Greenstone Group 靈活嘅治療方法具有科學根據，其中包括認知行為療法，以客戶為中心，畀你可以喺一個安全嘅環境裏面紓解困擾，並搵到前進嘅道路。
準備好開始你人生嘅新一頁？同 Karen 預約20分鐘嘅免費諮詢。喺心理健康月期間，The Greenstone Group 亦會提供折扣優惠。
喺網上了解更多關於 The Greenstone Group。
2. All About You Centre
Sonia Samtani 同佢喺 All About You Centre 嘅團隊相信情緒疾病同一般嘅生理病一樣，覺得唔舒服就應該睇醫生。為咗消除大眾對心理健康嘅歧視，All About You Centre 為港人提供方便又有效嘅心理輔導服務。呢間中心以英文輔導為主（同時提供廣東話同印地語輔導），以催眠、塔羅牌占卜、夫妻諮詢等治療方式，調節你嘅心理、情緒智商以及應對機制。心理輔導可以以私人課程、小組課程或研討會嘅方式進行。
有興趣探索All About You Centre嘅服務？了解一下有關星期一至六舉行嘅私人會議同研討會啦！
All About You Centre，上環蘇杭街19-25號永昌商業大廈10樓A室，電話：2992 0828 / 5435 8119 (Whatsapp)
3. 聖約翰輔導服務
喺1977年成立嘅聖約翰諮詢服務 (St. John’s Cathedral Counselling Service (SJCCS)) 係我哋首選嘅香港心理輔導機構之一。呢間位於市中心嘅服務中心唔單止交通方便，仲有多位專業輔導員，甚至可以提供多種語言嘅輔導服務。友善嘅職員亦都會緩解你喺申請同治療流程方面嘅任何疑慮。無論你係為情所困，定係希望學習管理壓力同憤怒，聖約翰都會幫你面對生活上面嘅各種挑戰。
聖約翰輔導服務，中環皇后大道中 110-116 號永興大廈 7 樓聖約翰座堂，電話：2524 2777
4. 突破輔導中心
突破輔導中心嘅輔導員都受到專業培訓，主要為19到30歲嘅年輕人提供個人心理諮詢，同埋為11到18歲嘅青少年提供家庭輔導服務。佢哋嘅服務只會以廣東話進行，每節輔導長50分鐘左右，個人輔導嘅費用係以你每個月收入嘅1.7%嚟計（需要月薪證明文件），性價比非常之高。
突破輔導中心， 佐敦吳松街191號突破中心2樓，電話：2632 0777
5. 香港撒瑪利亞防止自殺會
香港撒瑪利亞防止自殺會設有24小時電話熱線，提供包括自殺危機評估、緊急危機處理、危機介入輔導、轉介服務、網上情緒支援等等嘅服務。佢哋亦都組織咗一個叫做「活出彩虹服務」嘅支援小組，為自殺者親友提供唔同嘅協助，例如個案輔導、治療、義工等等。
去香港撒瑪利亞防止自殺會嘅網站了解更多。
6. 香港心理輔導中心 (HKPCC)
香港心理輔導中心 (HKPCC) 係一間提供全面精神科評估同輔導服務嘅私人機構。各位預約之後大約7日內就已經可以見治療師，唔使點排期。諮詢服務面向個人、家庭、已婚夫婦同婚前夫婦。一節輔導大概長50分鐘，可以用廣東話、英文或者普通話進行，而價錢就視治療師同服務而定。中心亦都有提供網上視像通話個人輔導服務，收費港幣$1,300。
香港心理輔導中心，旺角彌敦道678號華僑商業中心5樓B室，電話：6676 4236
7. Renewed Edge
Renewed Edge 喺香港提供廣泛嘅輔導服務，包括普通輔導、催眠治療、輔導教練同埋課程。除咗面對面嘅服務之外，佢哋仲有一個自我催眠嘅手機應用程式，以擴大服務範圍同埋提高輔導嘅效果。為咗令到每個人都可以充分咁發揮自己嘅潛力，團隊都會提供一切所需嘅工具同資源，去幫助佢哋克服挑戰。Renewed Edge 深信每個人都有改善生活嘅能力——你，又準備好未呢？
Renewed Edge Hypnotherapy & Counselling Centre ，黃竹坑香葉道41號9樓920室，電話：9884 8036
8. Connect Counselling
發現你好難同伴侶或者身邊嘅人保持親密？去 Connect Counselling 進行面對面或者線上治療啦。佢哋嘅心理輔導適合想同人建立有意義嘅關係嘅人，亦會幫助夫婦、失戀或離婚嘅人士渡過難關。Connect Counselling 嘅團隊充滿同理心，更會以有根據嘅治療方法，慢慢引導你走出陰霾。
Connect Counselling，中環及安里1-3號德及樓13樓1302室，電話：5190 0058（Whatsapp）
9. Henry Lam Online Productivity & ADHD Coaching
有冇發現你或者你身邊嘅人喺工作或者學習方面表現比較落後？呢個有可能係過度活躍症或專注力失調嘅症狀！患者嘅其他特徵包括容易分心、沮喪、健忘同缺乏規劃。不過，其實過度活躍症亦都有佢嘅好處㗎！人生教練 Henry Lam 會幫 ADHD 患者開發自身嘅潛力，令生活更加充實、積極，並且充滿動力。唔好錯過發揮自己潛力嘅機會——即刻報名參加免費課程，同教練 Henry Lam 一齊了解更多關於過度活躍症嘅知識啦！
喺網上了解更多關於 Henry Lam Coaching。
10. Sakura Counselling
你最近有冇感到悲傷、憤怒、焦慮或者孤獨？你有冇發現自己陷入咗難以打破嘅習慣？Sakura Counselling 可以幫到你。呢個心理輔導中心由註冊治療師 Tamsyn Rippon 創立，為成人、青少年、父母同家庭提供面對面同線上治療，幫佢哋擺脫困擾同冇益嘅諗法。Tamsyn 鼓勵你積極選擇、建立同練習生活心理技能，以幫助自己同其他人建立更健康嘅關係。Sakura Counselling 亦都會同其他專業人士合作舉辦研討會，提供支援心理健康嘅對策。
睇吓 Sakura Counselling 專家提供嘅健康秘訣啦！
Sakura Counselling 喺香港仔同中環都有辦公室。
11. Open Heart by Arise Asia
Open Heart 嘅線上心理治療配對平台可以畀你同超過30個唔同專科嘅註冊臨床心理學家進行聯繫，包括職業治療師、兒童心理學家等。最重要嘅係 Open Heart 重視身體同心靈健康之間嘅關係，所以有提供獨特嘅綜合住院同日托創傷治療方案，為你提供專業援助。另外，呢個心理輔導平台亦都採用咗人工智能，為治療師提供最新嘅見解、資源同大數據，同時亦保證完全保密客戶嘅個人資料。
喺網上了解更多關於 Open Heart by Arise Asia。
12. Oasis
The Vine 係一間國際教會，亦都提供英文嘅心理輔導服務。因為防疫限制，所有服務暫時都淨係喺網上舉行。而申請輔導服務嘅時候，輔導員會首先安排15分鐘嘅免費電話諮詢，跟住可以繼續傾大概50分鐘，另外收費。
Oasis，灣仔灣仔道133號卓凌中心19樓A室，電話：3527 6054
13. Maple Tree Counselling
Maple Tree Counselling 會依照每個人唔同嘅需要，而為佢哋度身訂造一套全面式嘅治療方法。團隊提供嘅治療方案都有醫學證據支持，包括認知行為治療 (CBT)、接納與承諾治療 (ACT)、靜觀減壓 (MBSR) 同情感導向治療 (EFT)。Maple Tree Counselling 希望鼓勵每個人都可以喺成長嘅過程中積極尋求蛻變，同時促進自己嘅情感健康。
Maple Tree Counselling，中環德輔道中19號環球大廈27樓 ，電話：6375 6098
14. Betterhelp
有咗 Betterhelp 呢個 app，搵心理輔導同諮詢服務就方便好多啦！呢個美國 app 希望令心理諮詢服務更加可及同負擔得起，俾任何喺生活入面遇到困難嘅人都可以隨時獲得幫助。雖然 Betterhelp 淨係提供英文服務，但係佢勝在喺世界各地都用得到。下載咗個 app 之後，你要答幾個問題，跟住等大約24個鐘，Betterhelp 就會為你配對好一位輔導員。俾錢之後，你就可以定期透過電話、視像通話或者短信進行輔導。我哋親身用過呢個 app，真心覺得方便又抵用！
去 Betterhelp 嘅網站了解更多。
15. 人際輔導中心 (Resource)
喺1973年成立嘅人際輔導中心 (Resource) 係一間註冊慈善機構，主要理念係「助人自助」，即係幫人適時處理情緒，從而修補人際關係。人際輔導中心為住喺香港嘅唔同人士提供最少七種語言嘅專業輔導服務，諮詢範圍包括婚姻同感情問題、子女教養、焦慮、壓力、抑鬱、喪親等等。
人際輔導中心 ，灣仔軒尼詩道8-12號中港⼤廈701室
16. OCD & Anxiety Support HK
喺香港，免費嘅心理輔導服務唔算普遍，所以我哋特別多謝好似 OCD & Anxiety Support HK 咁樣嘅非牟利組織，俾廣大市民都可以享有諮詢嘅機會。佢哋嘅支援小組每個禮拜都會舉行在線或者實體嘅聚會，亦都支持小組、個人，甚至家庭諮詢。講英文嘅朋友不妨參加吓佢哋嘅聚會，順便識吓同路人，互相扶持。
去 OCD & Anxiety Support HK 嘅網站了解更多。
[本文原於2021年3月出版，並於2024年由李綺婷更新。]
