連姜B都叫大家預防 HPV，大家又 check 咗未呢～ 為咗幫大家作出最啱自己嘅選擇，我哋集合咗香港有提供 STD test 嘅各間診所。係時候好好照顧自己同身邊人喇！
即使而家已經係21世紀，亞洲人喺講起「性」方面嘅時候，比起外國人，感覺依然比較避忌，亦都好少會公開討論。但係性始終係我哋生活嘅一部分，亦都係影響健康嘅重要一環，大家又點可以唔理呢？無論你係搵緊另一半，定係已經準備緊同摯愛去嘆吓酒店，為咗方便大家，我哋整理咗一份我哋認為最值得信賴，並且有提供性病檢查服務嘅香港公共診所、非政府診所同埋私營醫療機構名單。如果你希望可以搵間可靠嘅診所定期做 STD test，呢個 list 就會幫你一眼睇曬所有選擇，冇有怕啦～
點解要做 STD test？
講起「性」呢家嘢，其實大家最驚都係一樣嘢㗎啫…… 冇錯，就係性病。根據衛生防護中心嘅資料，香港最常見嘅性傳播疾病有梅毒 (syphilis)、淋病 (gonorrhoea)、非淋菌性尿道炎（男）(non-gonococcal urethritis)、非特異性生殖器感染（女）(non-specific genital infection)、陰部疱疹 (genital herpes)、性病疣 (genital wart)、陰蝨 (pubic lice)、衣原體性尿道炎 (chlamydia)，同埋愛滋病病毒感染 (HIV/AIDS)。所以無論同邊個上床都好，性活躍嘅各位都應該接受定期嘅性病檢查 (STD test)，確保自己冇感染任何性病。老實講，邊個會貪玩走去做性病檢查丫？但係如果唔做，又有邊個可以承擔得起嗰個「萬一」呢？所謂預防勝於治療，大家都係乖乖哋去定期檢查一下啦。再加上香港周圍都有診所提供唔同價格嘅服務，都算任君選擇，所以真係冇得卸膊㗎。係時候 book 翻個期喇！
i) 公共診所
提供 STD test 嘅社會衛生診所
衛生署轄下嘅社會衛生診所都會為合資格嘅香港居民或香港身份證持有人提供免費性病檢測、治療同埋輔導服務。呢啲社會衛生診所有啲淨係提供服務俾男士或者女士，有啲就兩種服務都有。香港一共有四間現時提供服務嘅社會衛生診所，分別喺灣仔、觀塘、屯門同粉嶺。雖然好處係呢啲診所又抵，又唔使醫生轉診，但係佢哋就淨係接受 walk-in，所以大家最好預多啲時間去喇，同埋留意返：呢啲診所喺星期六、日同公眾假期都休息㗎。
1. 灣仔女性社會衞生科診所
灣仔女性社會衞生科診所：灣仔皇后大道東284號鄧志昂專科診療院7樓（男性社會衞生科診所位於6樓），電話：3103 2400
2. 容鳳書社會衞生科診所
容鳳書社會衞生科診所：觀塘茶果嶺道79號容鳳書紀念中心4樓 ，電話：2727 8315
3. 屯門社會衞生科診所
屯門社會衞生科診所：屯門屯利街4號屯門眼科中心5樓，電話：2459 2958
4. 粉嶺社會衞生科診所
粉嶺社會衞生科診所：粉嶺璧峰路2號粉嶺健康中心6樓，電話：2639 1437
5. 柴灣社會衞生科診所（現時服務暫停）
柴灣社會衞生科診所：柴灣樂民道3號東區尤德夫人那打素醫院專科門診大樓地庫5樓西翼，電話：2595 7500
6. 油麻地女性社會衞生科診所
油麻地女性社會衞生科診所：油麻地炮台街145號油麻地賽馬會分科診療所4樓（女性社會衞生科診所設於3樓），電話：2388 6634
ii) 非政府診所
香港家庭計劃指導會（家計會）
相信唔少人都有聽過家計會呢個組織。家計會係一個志願機構，喺香港唔同地方都設有診所，提供男性同女性嘅健康服務，包括性病普查。不過，家計會淨係接受預約，而且喺假期期間都會特別 full，所以大家記得提前 book 喇。
再睇睇家計會嘅服務同收費啦。佢哋有提供幾種唔同嘅 STD 檢查組合，其中包括女性/男性性病普查1（即血液化驗梅毒及愛滋病毒抗體），費用為$250起；女性性病普查2（即子宮頸拭子衣原體同淋病DNA測試、上陰道滴蟲同念珠菌化驗），費用為$550起；同埋男性性病普查2（即小便化驗衣原體抗原同淋病DNA測試），費用都係$550起。
如果你係未夠26歲嘅未婚女性，你可以用家計會嘅青少年保健服務進行上述嘅女性性病普查。唔使擔心，佢哋係絕對保密㗎。
提供男女性病檢查嘅家計會診所：
5. 荃灣診所
荃灣診所：荃灣青山道264-298號南豐中心16樓1621-1622室，電話：2742 8183
6. 灣仔性與生殖健康中心
灣仔性與生殖健康中心：灣仔軒尼詩道130號修頓中心9樓，電話：2572 2222
7. 馬頭涌診所
馬頭涌診所：九龍馬頭涌道105號1-2樓，電話：2572 2222
只為女性提供性病檢查嘅家計會診所：
8. 元朗診所
元朗診所：元朗安寧路149-153號地下及1樓，電話：2477 3201
9. 黃大仙診所
黃大仙診所：黃大仙下邨(二區)龍安樓1-2號地下，電話：2326 2447
家計會青少年保健中心（只為26歲以下未婚女性而設）：
10. 灣仔青少年保健中心
灣仔青少年保健中心：灣仔軒尼詩道130號修頓中心8樓家計會賽馬會青Zone，電話：2575 4799
11. 旺角青少年保健中心
旺角青少年保健中心：油麻地彌敦道573號富運商業中心13樓A室，電話：2770 4994
14. 葵芳青少年保健中心
葵芳青少年保健中心：葵涌興芳路223號新都會廣場第2座七樓702-705室，電話：2443 2773
15. 關懷愛滋（AIDS Concern）
「關懷愛滋」係香港第一個致力於愛滋病諮詢服務嘅 NGO，為男男性接觸者或25歲以下嘅青少年提供免費、不記名同絕對保密嘅 STD 測試服務，包括愛滋病病毒（抗原/抗體）快速測試、梅毒抗體快速測試、丙型肝炎抗體快速測試、以及淋病同非淋病性尿道炎（衣原體）尿液測試。僅限預約。
關懷愛滋：佐敦庇利金街14-20號富利商業大廈3樓B室「關懷愛滋」健康服務中心，電話：2394 6677
16. 香港愛滋病基金會（HKAF）
作為一個喺1991年成立去控制愛滋病傳播同促進大眾了解嘅非牟利機構，香港愛滋病基金會提供免費同絕對保密嘅 HIV 檢測，以及快速梅毒同丙型肝炎抗體檢測服務。喺呢度，你唔需要擔心其他人嘅目光，因為基金會只係一心為社區人士提供關懷同方便嘅服務，並且幫助大家認清自己嘅身體狀況，保持健康。你可以打電話、用 Whatsapp 或者 Line 進行預約。
香港愛滋病基金會：筲箕灣柴灣道8號筲箕灣賽馬會診所5樓，電話：2560 8528
iii) 提供 STD 檢查服務嘅私營醫療機構 / 私家診所
17. Pulse Clinic
喺泰國成立嘅 Pulse Clinic，而家已經擴展到香港、新加坡同馬來西亞，致力推進各地嘅性健康教育同福祉。 Pulse Clinic 對 LGBTQ+ 群體友好，服務亦都非常之友善，所以係其中一間我哋最為推薦嘅診所之一。
Pulse Clinic：中環威靈頓街83號2樓，電話：2389 8250
18. 可托醫療（AttoHealth）
可托醫療嘅性健康診所可以即時檢測同提供全面嘅護理。佢哋提供快速嘅性病檢測、報告同治療——全部都可以喺一個工作天內完成，夠晒快捷方便！診症由註冊醫生主理，而且所有服務都會保密。檢測範圍亦都十分之廣泛，包括梅毒、皰疹、HIV、乙型肝炎等等。無論你對性健康有咩疑問，你都可以喺可托醫療向專業人士提問。
可托醫療喺中環同尖沙嘴都設有診所。
19. 創健醫療（Neo-Health）
方便嘅地理位置同優質嘅護理都令到創健醫療成為香港性病檢測嘅好選擇。呢度嘅檢測範圍廣泛，覆蓋淋病、梅毒、人類乳突病毒、皰疹、甲型嗜血桿菌、乙型肝炎等常見嘅性病。就算喺午飯時間都可以趁住個空檔嚟呢度檢查啦！
創健醫療：中環德輔道中19號環球大廈11樓1106室，電話：3160 4886
20. 嘉偉男士健康中心（MHS）
呢間男性健康中心提供專科諮詢、健康檢查計劃，以及性病檢測同治療。MHS 提供不同類型嘅性病檢測，例如抗體檢測、抗原檢測同DNA檢測。佢哋設有$300至$3,000嘅性病評估套餐，可以配合唔同嘅需要同預算。
嘉偉男士健康中心喺中環同尖沙嘴都設有分店。
21. 領康醫療（OT&P Healthcare）
領康醫療擁有良好信譽，團隊會喺舒適嘅環境裏面為你進行檢測，而且保護你嘅個人私隱係佢哋首要嘅任務。加上全個過程都會由資深醫生監督同照顧，解答你任何問題同提供專業診症。
領康醫療喺全港有多間診所。
22. 時代醫療集團
時代醫療集團運用先進嘅技術同豐富經驗提供全面嘅性病檢測。超過15年間，時代醫療集團已經服務過20萬位客人，處理過百萬個樣本，絕對值得信賴。
時代醫療集團喺上水同尖沙嘴都設有診所。
23. 香港急症中心
擔心自己已經患有性病，搞到心慌慌？唔洗成晚瞓唔著喇，因為香港急症醫學中心24小時為你服務！佢哋提供獨特嘅上門檢測服務，方便你無論喺屋企、辦公室定係酒店，都可以隱密檢查。結果仲可以喺同一日出爐添，夠晒快捷！
香港急症中心喺中環同尖沙嘴都設有診所。
