中環食 lunch 好去處：以下有放題、中東菜、緬甸菜、沙律、芝士牛肉漢堡...... 應有盡有！
喺中環返工嘅打工仔，想同同事食好嘢，唞一唞？除咗露天餐廳同打卡一流嘅蛋糕店之外，中環亦都有唔少性價比高，又豪華嘅午餐聚腳點。已經約好放工去 happy hour 嘆嘢飲嘅你哋，不妨提早喺 lunchtime 輕鬆吓？以下我哋推薦嘅中環 lunch 午餐好去處一定有一間啱你口味！
【餐廳推介】中環食 lunch 好去處
1. Chaiwala
中環午餐時段實難搵位嘅，不過喺旺中帶靜嘅 Chaiwala，你就一定可以享受到舒適嘅用餐環境。隱藏喺雲咸街上一道寶藍色嘅牆後面，Chaiwala 係一間寬敞而且色彩繽紛嘅印度餐廳。暫時逃離中環嘅喧囂，透過美食前往充滿活力嘅印度，品嚐美味佳餚。時間緊逼嘅話，你可以揀 Express Lunch，有四種唔同嘅套餐比你選擇，包括雞肉、羊肉、魚或者素食。每個套餐都包有咖哩同印度烤肉，再配上米飯、印度烤餅、甜品同其他道地配菜，以中環 lunch 嚟講，絕對性價比一流！
Chaiwala，中環雲咸街43-55號余悅禮行地庫，電話：2362 8988
2. 魚治
中環居酒屋魚治除咗有出名嘅嘅 A4 和牛三文治之外，仲有好多唔同種類嘅 lunch set。選擇有鰻魚飯、澳洲和牛生姜燒、海鮮刺身丼等。雖然定食已經包咗沙律、小食同麵豉湯，但仲未飽嘅朋友可以加錢試吓佢哋嘅吉列牛肉薯餅，保證百分百滿足！
魚治 ，中環威靈頓街2-8號威靈頓廣場M88 7樓，電話： 2217 8880
3. Treehouse
都市人好難可以食得既健康，又飽肚，但係去 Treehouse 食 lunch 就唔同喇！呢間中環餐廳有提供全素或蛋奶素 menu，包你夠晒營養。你可以直接享用店舖自家製嘅捲餅，選擇包括 Banyan（炒茄子蒜蓉鷹嘴豆泥捲餅）同 Sequoia（牛油果羽衣甘藍青瓜捲餅）。你亦都可以自製口味，加配藜麥、豆腐或者紅菜頭。差唔多所有醬料都係 Treehouse 每日新鮮製作，唔使擔心有任何化學物質。另外，Treehouse 亦都提供多種蕃薯條、蛋糕同鮮榨果汁。邊個話健康嘢就一定唔好食？
Treehouse，中環砵甸乍街45號 The Steps H Code 地下1號舖，電話： 3791 2277
4. R&R Bagels
鍾意食 bagel 嘅大家，下次經過中環可以試吓 R&R Bagels。佢哋嘅 bagel 有好多唔同餡任你揀，包括煙肉、煙三文魚、牛油果芝士等。我哋試過 The Vegan （餡料主要為火箭菜、椰子同杏仁），味道鮮甜，全素嘅朋友亦都唔使擔心唔夠選擇！店鋪同時有賣咖啡、茶同新鮮果汁，幫你食完午餐之後補充水分。
R&R Bagels，中環利源西街28號地舖，電話： 2178 5168
5. 俊軒越南餐廳
呢間係一間隱世越南餐廳位於皇后大道中與一條小巷嘅交界。 俊軒越南餐廳提供快速、輕鬆嘅用餐體驗，係打工仔嘅理想選擇。無論你想食牛肉定豬肉河粉，一定有咁你胃口嘅選擇。最後，唔想排長龍，就記得早啲到俊軒擺位啦。
俊軒越南餐廳：中環永吉街36號永吉利商業大廈地下E號舖， 電話：2907 4955
6. Cornerstone
米芝蓮一星名廚 Shane Osborn 繼 Arcane 後開咗 Cornerstone，係一間走親民路線嘅精品餐廳，開業半年之後已經登上咗米芝蓮指南。Cornerstone Express 嘅午市套餐菜單每星期換一次，包括一碟前菜同主菜。所有食材都經過精挑細選，當造新鮮，而且比起同地段嘅高級午餐嚟講，尚算價錢實惠。
Cornerstone，中環荷里活道49號，電話： 6809 9771
7. Orka Restaurant, Bar & Cafe
喺中環搵緊健康嘅午餐？Orka 會係你嘅最佳選擇。無論你係唔係素食主義者，你都可以喺 Orka 品嚐到最美味又有營養嘅餐點。喺午餐時段，呢間咖啡店兼餐廳會推出健康套餐，包括包括椰菜花湯或者炸豆泥同鹰嘴豆泥作為開胃菜，跟住有唔同嘅主菜選擇，例如秘魯雞胸肉、三文魚配小米、純素意粉等等。最後，你仲可以加啲甜品同飲品令到你嘅午餐更加豐富。想試啲唔同嘅嘢？Orka由12點至6點亦都提供全日菜單，有用自家製漢堡肉餅同超級食物製成嘅漢堡包等更多嘅食物，保證你充足電，可以撐到收工！
Orka Restaurant, Bar & Cafe，中環雲咸街36號地舖，電話：3489 1217
8. Frenchies
呢間鄰里咖啡店位於荷李活道，提供各種糕點、三明治、麵包同咖啡。Frenchies 嘅所有麵包餡料都非常吸引，但我哋就最愛雞肉布里乾酪配松露吐司同蘑菇菠菜吐司喇！
Frenchies：中環荷李活道39-43號地舖
9. Spiga
大約300蚊就可以叫到一碟主菜，兼任食沙律同甜品！突然心血來潮想食義大利菜的話，Spiga 的半自助餐適合你。食物絕對沒有因為放題而降低水準，而且種類繁多，有煙三文魚、巴馬火腿、咖啡撻、椰子蛋糕等。雖然以上食物全部都任食，令人難以抗拒，不過謹記留肚食 Spiga 的招牌 pizza 和手製意粉啊。
Spiga，中環皇后大道中31號陸海通大廈3樓，電話：2871 0055
10. 沾仔記
想喺中環食個快晏，可以去威靈頓街嘅沾仔記。呢間經典麵館主打雙拼湯麵，有鯪魚丸、蝦餃同牛肉片揀。最後，記得帶現金，因為尖仔記唔收卡㗎！
沾仔記：中環威靈頓街98號地下B鋪，電話：2850 6471
11. Croque
位於威靈頓街嘅 Croque 係另一個中環午餐好去處。呢間三文治專門店將法式美食風格同樸實嘅麵包結合，創新美味得嚟，仲要價錢相宜！你可以試吓 The Classic 等招牌三文治，搭配火腿、埃曼塔爾芝士、莫奈調味醬同泡菜。Veggie Trotter 等素食選擇亦同樣令人胃口大開，不過記得留肚試埋 Croque 嘅港式西多士呀！
Croque：中環威靈頓街78號地舖，電話：5607 5586
12. Basehall and Basehall 02
唔知揀食麵好，定係食漢堡包好？一於去 Basehall 同全新嘅 Basehall 02，一次過嗌晒佢！呢個中環 food court 有一系列嘅商戶，包括有韓國餐廳 Moyo、健康之選 Benko by Nüte、主打多汁日本豬排嘅Porker、充滿活力嘅印度餐廳 Bengal Brothers 等等。除咗種類繁多，Basehall 嘅氣氛亦都好友善輕鬆，係一眾打工仔嘅飯堂。
Basehall，中環康樂廣場1號怡和大廈LG樓，電話：2798 0668
13. Bedu
想轉轉口味，試吓中東菜？歌賦街嘅 Bedu 由12點至3點提供午餐，可以食餡料十足嘅地道 pita，味道有羊肩紅椒芝士、黃姜香草雞肉、素食嘅鷹嘴豆泥蔬菜等。餐廳同時提供是日甜品同飲品，價錢相宜之餘又好味，絕對值得一試！
想了解更多，參考 Bedu食評（英文版）。
Bedu，中環歌賦街40號地舖，電話：2320 4450
14. Nood Food
想午餐食清啲？位於荷李活道嘅 Nood Food 提供各類沙律、雞胸肉、蔬菜湯、鮮奶昔同冷榨果汁，適合鍾意健康飲食嘅朋友。餐廳環境光猛舒適，可以一邊食晏一邊欣賞街景，另外亦都有提供外賣服務。
Nood Food，中環蘇豪荷李活道32號建業榮基中心2樓，電話：8199 8189
15. Morty’s Delicatessen
三文治係最經典嘅午餐選擇之一，其中 Morty’s Delicatessen 嘅三文治更加係出咗名平靚正！鴨肉、火雞肉、煙肉、瘦肉等，餡料選擇豐富。Morty’s 專用高質嘅煙燻肉嚟製造三文治，你亦都可以加配牛油果、瑞士芝士、吞拿魚等等嘅配料，某啲款式甚至可以畀你揀麵包同醬料。特色三文治有幾款，例如紅菜頭山羊芝士拼松露煙雞肉。
Morty’s Delicatessen，中環康樂廣場1號怡和大廈地庫12-14號舖，電話： 3665 0900
16. Mak Mak
呢間泰國餐廳唔單止滿足食肉獸，亦顧及咗一班素食主義者。經典菜式有冬蔭功、炒金邊粉、綠咖喱，金柚子沙律、炸軟殼蟹等，全部都 keep 住高水準！如果你趕時間嘅話，可以去 Mak Mak 嘅 grab-and-go station，有咖喱、炒粉麵同甜品畀你外賣自取。
Mak Mak，中環皇后大道中15號置地廣場2樓217A室，電話： 2983 1003
17. Uma Nota
想體驗巴西日本菜嘅朋友留意喇：由中午12點至下午3點，你可以喺 Uma Nota 任食特色冷盤，例如冷蕎麥麵同和風烤茄子！如果想食得飽啲，不妨加配佢哋嘅主菜，款式有伊帕內瑪排骨 、烤三文魚、牛肉蓋飯等等。另外仲可以加買咖啡、茶，或者甜品，再配一杯特色雞尾酒就正啦！
Uma Nota，中環蘇豪卑利街38號地下C號舖，電話：2889 7576
18. Barkada
喺2022年先新開張嘅Barkada，一場刺激嘅美食之旅正等著你！由美籍菲律賓作家 Jen Balisi 同 Singular Concepts 合作創立嘅 Barkada，喺菲律賓文入面意味著「一班朋友」；顧名思義，佢哋最歡迎一大班人嚟聚腳，一齊享受獨特同正宗嘅菲律賓美食。菜單受到當地嘅「pulutan」傳統啟發，提供多款菲律賓經典菜式同創新小食，更加有素食選項，滿足晒唔同嘅飲食需要。
Barkada，中環閣麟街46-48號地庫 ，電話：2663 0238
19. The Pizza Project
The Pizza Project 嘅午餐 CP 值超高，係唔少打工仔嘅恩物！由12點至3點提供嘅午市菜單每星期都會變，包你食極都唔嫌，而且總會有前菜、經典披薩，同埋甜品，保證你食到捧腹而歸。
The Pizza Project，中環蘇豪卑利街26號地舖，電話：6215 2808
20. 唯一軒
喺半山電梯下面，你會揾到一間隱世嘅中環午餐好去處：唯一軒。呢間餐廳主打京川菜，並用一種獨特嘅形式呈現。餐廳裡面嘅裝修融合咗1950年代嘅復古風同現代美學，再用現代藝術品去襯托傳統裝飾，韻味十足。唔好錯過唯一軒價錢實惠嘅三道菜或者四道菜午餐套餐，有麻婆豆腐、擔擔麵、小籠包等嘅經典菜式，仲配埋茉莉花茶添。
唯一軒，中環半山堅道59號地舖，電話：2523 2872
[本文原於2020年9月出版，並於2024年由李綺婷更新。]
