自己嘅寵物病個陣，簡直心如刀割！好彩，以下幾間獸醫診所會為你同你嘅毛孩提供最好嘅照顧，幫佢哋早日康復。
由領養毛孩，到同佢哋去全港最靚嘅寵物公園同露營場所chill一chil l—— 有時候，我哋對自己嘅寵物真係仲好過對陌生人呀！如果你屋企咁啱有隻生病嘅毛孩，以下嘅香港獸醫同寵物診所都值得 mark 低，以備不時之需。有啲獸醫診所甚至開足24小時，俾大家喺半夜三更都可以急 call，為你嘅寵物提供最及時、最體貼嘅照顧！
香港最可靠獸醫及寵物診所
1. 愛護動物協會（SPCA）
作為香港最出名嘅慈善團體之一，愛護動物協會（SPCA）喺各區都設有獸醫診所，由市中心地帶到比較偏遠嘅梅窩同長洲都有。SPCA 配備咗專業嘅醫療器材，有啲中心更加提供24小時緊急服務，兼且有兩間流動診所，分別用作診症同提供絕育手術服務。
愛護動物協會（SPCA）喺全港都設有獸醫醫療中心。
2. Creature Comforts Veterinary Group
呢間香港獸醫集團為寵物提供三項專業服務。位於筲箕灣嘅係24小時東區動物醫院，而位於將軍澳嘅就係一間獸醫中心，同埋有上門看診服務。Creature Comforts 嘅筲箕灣醫院接受急症患者，並喺晚上9點至早上8點進行常規診症。兩間中心亦都配備咗專業醫療設施，確保你嘅寵物得到最充分嘅治療。
東區動物醫院，西灣河筲箕灣道256號，電話：2915 3999
TKO 獸醫中心，將軍澳唐俊街21號翩匯坊G18號舖，電話：2915 7007
3. 蘇利宜動物醫院
搵緊香港最好嘅獸醫診所？一於去蘇利宜動物醫院啦。呢間寵物診所設有專門嘅外科病房、放射科同牙科病房，仲有驗血設備。另外，蘇利宜動物醫院甚至有一間帶有雙層玻璃嘅病房，可以盡量減少噪音，安撫對聲音敏感嘅貓貓，十分之體貼！
蘇利宜動物醫院，半山堅道130號，電話：2291 0065
4. 半山貓醫院
作為港島唯一嘅貓科醫院，半山貓醫院會為你嘅貓咪提供全面又專業嘅獸醫服務。特別值得一提嘅係醫院嘅室內裝修專為幫助貓貓減壓而設，十分之體貼。醫院提供24小時急症服務、諮詢、身體檢查同手術，為你嘅貓皇提供全面護理。
半山貓醫院，半山般咸道3號般安閣地下A鋪，電話：2688 0013
5. Dr Hugh’s Veterinary Hospital
由 Hugh Stanley 博士領導嘅獸醫院憑藉著專業嘅服務同先進嘅醫療設施，成為香港最受推崇嘅獸醫診所之一。除咗提供科學診斷同治療之外，呢間診所更加優先考慮動物嘅舒適度。Dr Stanley 嘅獸醫醫院為容易緊張嘅毛孩提供定制諮詢室、專用手術室、超聲波、X 光影像等。
Dr Hugh’s Veterinary Hospital，天后永興街2A號，電話：2380 0612
6. 香港專科獸醫醫院
香港專科獸醫醫院係一間大型緊急獸醫院，只會接受獸醫轉介或者急症嘅病患。佢哋專門提供癌症治療、眼科疾病治療、內科治療同心臟病療程。呢間專科醫院全年無休，就算係公眾假期都照樣開放，方便小動物喺緊急情況下求醫。
香港專科獸醫醫院喺灣仔同何文田都有分院。
7. 大圍珍禽異獸及寵物醫院
如果你擁有比較珍稀嘅小動物，你就一定要關注呢間特別嘅香港寵物醫院！無論係鸚鵡、龍貓、刺蝟定係蛇，呢度都會有獸醫幫到你。大圍珍禽異獸及寵物醫院由兩位英籍獸醫喺1997年創立，為貓狗同埋珍稀寵物提供牙科檢查、絕育手術等服務。佢哋仲每日提供24小時同公眾假期急症服務。
大圍珍禽異獸及寵物醫院，沙田大圍積信街69-75號，電話：2687 1030
8. Paws & Tails 動物醫院
Paws & Tails 動物醫院喺2022年2月開業，利用先進嘅技術嚟幫你醫好你嘅毛孩。呢度嘅獸醫團隊提供疫苗接種、心臟病治療、牙科診症、X 光、軟組織手術、超聲波、針灸等治療。佢哋甚至有一間專屬貓咪嘅等候同諮詢室，以防你嘅貓貓因為其他動物而感到不安。
Paws & Tails 動物醫院，上環普仁街4號，電話：2832 2836
9. Pets Central
由門診到專科服務，Pets Central 嘅獸醫團隊都有廣泛嘅專科經驗同操作最先進儀器嘅技術。服務範疇包括針灸、牙科、腫瘤科、行為醫學、寵物美容、內科等等。我哋覺得 Pets Central 最優秀嘅地方在於佢哋建立咗一個線上平台，俾你可以用「遙距獸醫診症服務」同全球嘅專家進行虛擬諮詢，即使喺疫情期間足不出戶，都可以幫你悉心照顧小毛孩啦！
Pets Central 喺香港設有幾間診所。
10. 雅各動物醫院
雅各動物醫院（Acorn Veterinary Hospital）係一間深受香港寵物家長歡迎嘅獸醫院，擁有先進嘅醫療外科技術。佢哋專業兼高質素嘅團隊專為貓、狗、兔仔同各種小型哺乳動物提供治療。無論係一般診症同牙科治療定係化療服務，甚至到MRI同CT掃描等嚴重嘅情況，雅各動物醫院都可以幫到你同你嘅寵物。
雅各動物醫院，西營盤第二街68-80號地下，電話：2540 0228
11. NPV 動物醫院及獸醫診所
由非牟利獸醫動物協會（NPV）所經營嘅動物醫院同獸醫診所提供一系列服務，包括防疫保健、手術、門診、24小時緊急醫療服務，甚至有得照 X 光、CT 同 MRI。NPV 相信獸醫服務應該貧富共享，所以注重寵物同主人嘅福利之餘，仲有投入唔少社會資源，幫助流浪動物。另外，協會亦都會喺每個星期五同六喺粉嶺開設流動診所，以滿足新界居民同佢哋寵物嘅需要。
NVP動物醫院及獸醫診所，太子基隆街22-24、50及77號，電話：2393 2070
[本文原於2022年3月出版，並於2024年由李綺婷更新。]
