諗起返到香港要檢疫隔離就驚到唔敢飛？唔使擔心，我哋已經幫你搵晒全港最舒服嘅12間隔離酒店，包保你住得安心又寫意——甚至會唔想 check out 添！
擔心強制隔離而唔敢去旅行？我哋都係呀！不過，如果你萬一真係要出國，好彩嘅係，香港有相當全面嘅指定檢疫酒店比你揀。再加上而家香港終於開始逐步放寬旅遊同入境限制，隔離時間縮短至3日，相信大家都即刻心郁郁想飛呀！無論你係希望搵到性價比高嘅酒店，定係想趁呢次機會揮霍一番，享受一次「悠長假期」，我哋以下就為你盤點香港12間最優質嘅隔離酒店，保證你住得舒服又滿意。
註：呢篇文章已經根據政府第八輪指定檢疫酒店名單進行更新（有效期至2022年10月31號）。另外，呢度列出嚟嘅酒店係根據每人每晚嘅最低費用排列。價錢全部以港元計算。
入住之前，首先睇下呢啲小貼士！😉
喺我哋列出香港最佳檢疫酒店之前，呢度有幾個小貼士俾準備預訂或者入住隔離酒店各位嘅：
- 為咗公共衛生同安全起見，有唔少酒店都唔俾檢疫房客開窗嘅；如果你特別希望可以開窗，請事先同酒店確認。
- 推薦大家帶埋空氣淨化器、香薰、濕紙巾，甚至係迷你吸塵器。
- 大多數酒店都有相連房，不過視乎供應情況。
- 隨時攜帶自己可以重用嘅餐具。（愛護地球，人人有責吖嘛～）
- 大家可以帶自己嘅迷你微波爐或者熱板嚟重新加熱你嘅飯餸。不過，請大家留意返酒店關於喺客房裡面煮飯嘅任何規定——我哋唔想搞到火燭呀！
- 轉插頭、HDMI 線同拖板應該會派上用場。
- 記得瀏覽政府網頁，了解有關抵港人士嘅衞生檢疫安排同香港檢疫酒店嘅最新資訊；每間隔離酒店嘅預訂情況亦都可以喺政府官網搵到。
- 雖然有時啲飛機而家話轉就轉，旅遊限制亦都變幻莫測，但係我哋依然會建議你儘早 book 定隔離酒店，因為以下呢幾間酒店真係好受歡迎㗎！另外，記住注意酒店有關退款同取消預訂嘅條款。
最佳香港隔離酒店
1. 香港奧華酒店．南岸
香港奧華酒店–南岸曾經係一個倉庫，所以喺佢嘅建築裏面都充滿咗傳統同現代嘅元素。呢間精品酒店特別將佢嘅隔離住宿套餐包裝成為別樹一格嘅「檢疫禮賓計劃」(Quarantine Concierge)。除咗包晒食宿之外，專業友好嘅酒店服務員都似「真人 Alexa」一樣咁樂於助人，而且會盡力滿足你由外界需要嘅各樣物資。更重要嘅係，客人入住嘅時候會發現一個裝得滿滿嘅迷你吧、一個禮包（包括洗漱用品同可重用餐具），仲有 Apple TV 同一個真正佢嘅 Alexa 添！
飲食：有素食、純素食/低卡、無麩質餐單等，每日俾你起碼4個選擇。
房內健身設備：有瑜伽墊、阻力帶等。你亦都可以網購更加大嘅設備，但係要事先通知酒店，以便職員幫你搬入嚟（不過可能需要額外收費）。
加分項：有 mindfulness kit、線上瑜伽工作坊、仲有每日舉行嘅 Social Hour——亦即係 happy hour——會送零食同酒精飲品俾你鬆一鬆。每個禮拜三仲可以喺線上同隔離鄰舍打招呼，一齊嘆酒添！
經濟之選：20平方米大嘅 Mini Twin Room 每晚 $750 起。
豪華之選：56平方米大嘅 Rockstar Suite 每晚 $5,300 起。
香港奧華酒店．南岸 (Ovolo Southside)，香港仔黃竹坑道64號，電話：2165 1000
2. 香港九龍貝爾特酒店
九龍貝爾特酒店有兩個隔離住宿套餐，主要分別係喺間房本身同埋個餐單。預訂貝爾特標準隔離住宿套餐 (Penta Standard) 嘅客人將會入住舒適嘅貝爾特標準客房，可以由酒店嘅「食得均衡」餐單裏面六揀一，品嚐一系列嘅自家製、無味精菜式。至於貝爾特高級隔離住宿套餐 (Penta Plus) 就會包括稍微大啲又時尚啲嘅高級客房，亦都配備咗優質嘅「食好D」餐單，提供更多選擇，仲有酒店廚師特別炮製嘅窩心湯水添！
飲食：有清真、素食、純素食、無海鮮等等嘅餐單，適合有食物敏感或者特定要求嘅人。
加分項：快速同特別友好嘅服務！
經濟之選：22平方米大嘅貝爾特標準客房每晚 $770 起。
豪華之選：44平方米大嘅貝爾特套房每晚 $2,300 起。
香港九龍貝爾特酒店 (Pentahotel Hong Kong, Kowloon)，新蒲崗六合街19號，電話：3112 8222
3. 香港東涌福朋喜來登酒店
雖然尖沙咀喜來登酒店冇繼續喺香港指定檢疫酒店名單裏面，但係位於東涌嘅福朋喜來登酒店都唔錯㗎，甚至更加物超所值。雖然佢喺相對偏遠嘅大嶼山，但係除非你想叫市中心嘅外賣啦，否則位置應該唔係問題嚟嘅。憑藉酒店舒適嘅客房同高檔床鋪，你絕對可以喺入住期間好好休息。不過，其實呢間酒店最正嘅係佢嘅海景客房同套房，因為佢哋都提供一覽無遺嘅海景，仲有令人歎為觀止嘅日落添！
飲食：有中式、西式、素食餐單等。雖然我哋唔想破壞驚喜，但係聽講酒店每個禮拜五都會推出一啲小獎勵㗎！
房內健身設備：每間房都配有自己嘅運動墊。
相對實惠嘅選擇：20平方米大嘅傳統客房每晚 $1,050 起。
豪華之選：40平方米大嘅海景套房每晚 $2,900 起。
了解更多關於福朋喜來登酒店嘅隔離住宿套餐。
香港東涌福朋喜來登酒店 (Four Points by Sheraton Hong Kong, Tung Chung)，東涌怡東路9號，電話：2352 8035
4. 香港萬怡酒店
喺香港萬怡酒店嘅客房同套房中恢復體力啦！每間房都擁有萬豪集團標誌性嘅床鋪、LED 電視、大理石浴室同淋浴間，仲有維港美景，俾你能夠放鬆身心。
飲食：一日三餐提供湯、沙律、主食、水果同飲品。高級套餐嘅餐單每五日換一次。
加分項：靚景呀，各位！
相對實惠嘅選擇：24平方米大嘅城市景觀客房每晚 $1,130 起。
豪華之選：49平方米大嘅行政套房每晚 $3,180 起。
了解更多關於香港萬怡酒店嘅「三餐無憂住宿套餐」。
香港萬怡酒店 (Courtyard by Marriott Hong Kong)，西營盤干諾道西167號，電話：3717 8888
5. 南灣如心酒店
雖然同呢份名單上嘅某啲酒店相比，南灣如心酒店可能有少少偏僻，但係它毗鄰大海，又擁有寬敞嘅套房，簡直充滿度假 feel；有啲房甚至有陽台或者露台添！你亦都可以揀你想要嘅房間景色，無論係向南望向深水灣同香港仔，抑或係向北望向山頂的大自然，風景都幾唔錯㗎。另外，我哋特別鍾意呢間檢疫酒店嘅團隊入面有可愛嘅機械人 Genie。佢可以應客人要求，送餐上門，俾小朋友一個驚喜㗎！
飲食：有「嚐素滋味」、「清真推介」、「健怡之選」、兒童餐單等嘅豐富選擇。
房內健身設備：你可以喺房入面加裝瑜伽墊、阻力帶、仰臥起坐桿、扭腰板等去保持活力（每件單獨收費）。
相對實惠嘅選擇：30平方米大嘅都市客房每晚 $1,200 起。
豪華之選：81平方米大嘅 Grand Aqua Suite 每晚 $6,600 起。
了解更多關於南灣如心酒店嘅3晚隔離住宿計劃。
南灣如心酒店 (Nina Hotel Island South)，香港仔黃竹坑道55號，電話：3968 8888
6. 問月酒店
呢間精品酒店以中秋節為靈感進行室內設計，屢獲殊榮。無論你揀新月客房、半月客房定係滿月客房，優雅別緻得嚟又舒服嘅問月酒店都一定會令你滿意。畢竟有一張大床、高清 LED 電視、揚聲器，仲有步入式淋浴間同獨立浴缸嘅大理石浴室嘅時候，我哋又點會怨呢？
飲食：由當地美食到國際風味，應有盡有。
房內健身設備：免費租用瑜伽墊，亦都可以額外租賃超靜音平板走步機（視乎供應情況）。
加分項： 所有客房都配有 Nespresso 咖啡機，提供免費嘅 Nespresso 膠囊同茶餅。
相對實惠嘅選擇：21平方米大嘅新月客房每晚 $1,330 起。
豪華之選：38平方米大嘅滿月客房每晚 $1,880 起。
了解更多有關問月酒店隔離住宿計劃。
問月酒店 (Mira Moon Hotel)，銅鑼灣謝斐道388號，電話：2643 8888
7. 港島英迪格酒店
英迪格酒店擁有水療中心等級嘅浴室、絕佳嘅城市景觀同充足嘅自然光線，全部都會幫你喺香港重新安頓落嚟。而家更加有一個限時優惠：預訂英迪格酒店嘅顧客可以享受第一輪免費迷你吧。客房裏面仲有一部 Nespresso 咖啡機，無限供應咖啡膠囊、奶精同糖，啱晒熱愛咖啡嘅你。
飲食：我哋雖然聽講有啲人不太鍾意份早餐，但係午餐同晚餐都幾受歡迎，尤其因為有牛扒同龍蝦呢類高檔材料，而且有素食選擇。
房內健身設備：有瑜伽墊可以免費租用（視乎供應情況），亦都有單車機同其他健身器材俾你租借或者購買。
加分項：酒店提供種子同花盆仔，俾你喺隔離期間培育植物，並幫間房增添一啲綠意，實在太體貼喇！另外，間房仲配備埋電動遮光窗簾同寬闊嘅落地玻璃窗添，直程冇得彈啦。
相對實惠嘅選擇：30平方米大嘅英迪格高級客房每晚 $1,480 起。
豪華之選：63平方米大嘅豪華套房每晚 $4,500 起。
了解更多有關港島英迪格酒店嘅隔離住宿套餐。
港島英迪格酒店 (Hotel Indigo Hong Kong Island)，灣仔皇后大道東246號，電話：3926 3888
8. 香港康得思酒店（由2022年9月24號起停止作為指定檢疫酒店）
位於九龍區人流至旺地帶嘅康得思酒店，係香港高檔五星級檢疫酒店嘅首選之一。除咗有豪華舒適嘅客房同套房之外，酒店亦都提供唔同類型嘅菜單任君選擇，仲可以隨時升級餐點添。
飲食：每日有早餐、午餐同晚餐套餐，選擇方面有中式、西式同素食，另外亦都有兒童餐。
相對實惠嘅選擇：26平方米大嘅高級客房每晚 $1,600 起。
豪華之選：126平方米大嘅主席套房每晚 $9,000 起。
了解更多關於康得思隔離住宿計劃。留意呢間酒店由9月24號起就會停止作為指定檢疫酒店。
香港康得思酒店 (Cordis, Hong Kong)，旺角上海街555號，電話：3552 3388
9. 香港嘉里酒店
搵緊適合成家人入住嘅香港檢疫酒店？如果你有足夠嘅預算，而且想同仔女一齊隔離嘅話，咁嘉里酒店就最啱你嘞。呢間位於九龍海濱嘅五星級酒店擁有寬敞嘅客房，可以為小朋友提供充裕嘅空間去擺放玩具同遊戲機，甚至放得落成個帳篷添！
飲食：膳食計畫包括早餐、午餐同晚餐套餐，全部都可以滿足特別嘅飲食要求，並且使用以玉米澱粉製造嘅托盤同可重用餐具供應，夠晒環保。嘉里酒店另一個賣點係你可以訂佢精美嘅下午茶外賣（包埋成個糕點塔㗎），由職員直接送到你房。記得影相打卡呀！
娛樂：講起優質嘅檢疫娛樂，梗係唔少得嘉里酒店啦。由頭部按摩課程同瑜伽課程，到酒店侍酒師親自主持嘅品酒會，嘉里酒店都會透過專屬嘅 Facebook 群組宣傳佢每日嘅線上活動，邀請隔離緊嘅客人加入。
加分項：酒店提供洗衣粉、洗碗液同百潔布，方便洗衫洗碗。另外，無限量嘅 Nespresso 膠囊同免費打印服務都對學生嚟講特別有用。
相對實惠嘅選擇：42平方米大嘅豪華客房每晚 $1,906 起。
豪華之選：90平方米的行政海景露台套房每晚 $16,500 起。
了解更多關於嘉里酒店嘅 Quarantine with Kerry 3晚隔離住宿計劃同3+4住宿計劃。
香港嘉里酒店 (Kerry Hotel, Hong Kong)，紅磡灣紅鸞道38號，電話：2733 8786
10. One-Eight-One 酒店及服務式住宅
One-Eight-One 酒店及服務式住宅唔單止有壯麗嘅維港景色，仲標榜著一流嘅服務，係香港最受歡迎嘅檢疫酒店之一。呢度提供 PS5 同 Nintendo Switch 嘅租賃服務，再加上免費使用嘅藍牙揚聲器，設備非常之齊全，而且寬敞嘅客房特別適合一家人一齊入住。部分嘅客房亦都有浴缸，俾你盡情享用酒店優質嘅有機浴室用品。
飲食：食宿全包，包括早餐、午餐同晚餐套餐。
房內健身設備：免費租用瑜伽墊同阻力帶。
加分項：抵達嘅時候，你會收到迎賓禮物同小食籃。當然，仲有免費嘅 Nespresso 咖啡啦。
相對實惠嘅選擇：33平方米大嘅城景客房每晚 $1,964 起。
尊貴之選：70平方米大嘅海景套房每晚 $6,800 起。
頂級享受：106平方米大嘅天禦居套房每晚 $50,000 起（適合一家四口）。
了解更多關於 One-Eight-One 嘅隔離住宿體驗。
One-Eight-One 酒店及服務式住宅，西營盤干諾道西181號，電話：3181 1688
11. 香港 W 酒店
香港 W 酒店為預備隔離嘅你加油！抵達酒店之後，你唔單止可以喺寬敞舒適嘅客房盡情休息，仲可以享受超級舒服嘅床鋪，兼欣賞城市或者海港嘅靚景。多得 W 酒店齊全嘅房內設施同餐飲選擇，隔離，又有咩好怕喎～
飲食：餐點由酒店嘅烹飪團隊準備，亦都有提供素食選擇。另外，酒店使用環保外賣盒同餐具，衛生得嚟又可以愛護地球，認真唔錯！
房內健身設備：提供娛樂、遊戲同健身器材，不過需要額外收費。
加分項：W 酒店推出咗獨家嘅「活力煥然體驗」，每日都會喺 Zoom 上面進行一系列嘅網上直播活動，俾你喺檢疫期間住得開心。
相對實惠嘅選擇：40平方米大嘅奇妙客房（城市景）每晚 $2,400 起。
尊貴之選：65平方米大嘅奇幻套房（全海景）每晚 $6,000 起。
頂級享受：200平方米大嘅頂級驚喜套房（全海景）每晚 $60,000 起。
了解更多關於 W 酒店嘅「活力煥然」香港檢疫長住計劃。
香港 W 酒店，九龍柯士甸道西1號，電話：3717 2222
12. 香港置地文華東方酒店
置地文華東方酒店，相信唔使點介紹啦！作為世界上最負盛名的豪華酒店之一，你可以放心，喺呢度住呢，必定係物有所值嘅——儘管，冇錯，係幾貴嘅。呢間酒店所有嘅客房都設有沙漏形浴缸、衣帽間、雙梳妝台組合連鏡面電視，仲有好多其他豪華設施。唯一要注意嘅係置地文華東方酒店只限由外面接收私人物品，唔俾收外賣㗎。不過，我哋聽講喺呢度住根本就唔需要叫外賣，因為啲伙食實在太好喇，絕對唔使擔心冇啖好食！
飲食：每日都有一流嘅早餐、兩道菜嘅午餐同三道菜嘅晚餐，亦都提供素食選擇。你可以揀自己嘅用餐時間。
房內健身設備：視乎供應情況。
加分項：額外點選客房用餐餐單上面嘅任何餐飲，可以享有八折優惠（不適用於迷你酒吧）。
相對實惠嘅選擇：42平方米大嘅 L450 高級客房每晚 $3,960 起。
尊貴之選：83平方米大嘅 L900 套房每晚 $10,010 起。
頂級享受：166平方米大嘅娛樂套房每晚 $61,600 起。
香港置地文華東方酒店，中環皇后大道中15號置地廣場，電話：2132 0188
