想知道香港有邊啲適合露營嘅地方？無論你係鍾意傳統露營，定係希望喺郊外都可以住得豪華啲，以下嘅露營好去處都會啱你心水！
雖然市內係一片石屎森林，但其實香港都係一個有唔少自然景觀嘅地方，尤其喺郊外就有多條行山徑、郊野公園等等俾大家享受吓寧靜，吸啖新鮮空氣。由連綿起伏嘅丘陵到微風輕拂嘅灘邊，我哋以下為大家集合咗香港露營嘅好去處。叫埋班 friend，帶定啲零食——係時候去冒險喇！
香港露營好去處
1. 西園
想喺香港露營，但同時又想有更加高級、舒適嘅享受？雖然純粹鍾意野外露營嘅人可能會嗤之以鼻，但係 glamping 豪華露營會係唔少都市人夢寐以求嘅體驗！呢個戶外遊樂場位於長洲嘅西南邊；超過11英畝嘅營地裏面有各種主題住宿，包括蒙古包、觀星圓拱屋等，全部都配備酒店標准嘅設施，例如冷氣，仲有私人浴室兼冷熱水沖涼。另外，西園亦都有一系列戶外活動俾大家玩；你可以喺日頭射箭同去樹頂走廊，然後夜晚喺篝火旁放鬆。膳食方面，西園可以為你提供晒早餐同燒烤自助餐，非常之方便。
交通：由中環五號碼頭或者香港仔海濱長廊搭渡輪去長洲。落船之後面向市政大樓，沿西泰路行到贊屯路，然後上山直至到山頂道嘅紅色大門。
了解更多關於西園。
2. 塔門
我哋最鍾意嘅香港露營好去處之一就係位於西貢東北海岸嘅塔門嘞！雖然有少少偏遠，但係清新嘅空氣、海岸線上面風景怡人嘅小徑等等都係令到呢個「草原小島」咁受歡迎嘅原因。喺星空之下紮營之前，記得參觀吓呂字疊石，並且喺附近嘅餐廳試試當地嘅海鮮。
想知道塔門有咩咁吸引？睇睇我哋嘅詳細介紹（英文版）。
交通：由馬料水或者黃石碼頭搭渡輪，落船之後沿著小路行到條村嘅北邊，再沿著指示牌到廁所，然後向呂字疊石行。
3. 南山
南山營地位於一片清幽嘅林地，距離貝澳海灘只有一箭之遙，俾你享受露營嘅樂趣之餘，仲可以方便去海邊散心。營地嘅設施包括煮食爐位、浴室等，仲有大嶼山郊野公園最大嘅一個燒烤場，而附近必去嘅南山觀景台，更加可以欣賞到梅窩同貝澳灣嘅全景。白天行山，夜晚燒棉花糖，夠晒寫意。
交通：由東涌市中心搭3M號往梅窩巴士，或者由梅窩搭途經南山嘅巴士，喺南山下車。營地就喺正南山巴士站旁邊。
了解更多關於南山營地。
4. 浪茄灣
位於西貢東郊野公園嘅浪茄灣，係呢座城市隱藏嘅露營聖地之一。雖然去浪茄灣可以要好幾個鐘，比較適合有經驗嘅遠足同露營人士，但係呢個地點勝在夠清淨，而且水清沙幼，亦都可以望到萬宜水庫嘅美景。不過，因為浪茄灣設施基本，甚至附近冇便利店，所以各位出發之前，記得執齊所有露營嘅必需品呀！
交通：由西貢市巴士總站搭94號巴士或者7號往海下專線小巴，又或者喺假日及公眾假期嘅時候喺鑽石山巴士總站搭96R號巴士。喺北潭涌落車之後，沿著麥理浩徑第一段車路經萬宜路向萬宜水庫方向行。經過萬宜水庫嘅西壩及東壩之後，轉入去往浪茄灣嘅小徑，行大約三個鐘，就會到達營地。
了解更多關於浪茄灣營地。
5. 西貢灣仔
繁星點點、風景如畫嘅西貢灣仔絕對唔會令你失望！位於大灘海附近有兩個露營營地——灣仔西同灣仔南營地——以遠眺海下灣海岸公園嘅壯麗景色而聞名。寬敞嘅營地有齊唔同露營設施，包括檯櫈、大型浴室、涼亭、燒烤爐等等。
交通：由西貢市巴士總站搭94號巴士，或者喺星期六、日或公眾假期喺鑽石山巴士總站搭96R號巴士，喺黃石碼頭總站落車，再搭由黃石碼頭往灣仔半島嘅渡輪。 落船之後，由灣仔碼頭行五分鐘左右就會到達營地。另一個方法係由西貢市巴士總站坐7號往海下專線小巴，喺海下村總站落車，沿著大灘郊遊徑行大約45分鐘。
