文質彬彬又充滿書卷味嘅各位～ 不妨去以下幾間書店買本漫畫或者二手書啦！
香港地 weekend 有咩好做？除左同毛孩喺寵物公園嘆世界同喺滑板公園踩板，大顯身手之外，亦都不妨去充滿文青氣氛嘅書店行吓。如果你成日「書」不離手，就算係身處柔軟嘅重力被下面都要沉醉喺故事裏面嘅話，你一定明白搵到一本好書係幾咁快樂嘅事！所以，我哋集齊咗最優質嘅香港書店 ，包括獨立書店、連鎖書局同二手書店，俾大家能夠靜心閱讀，增長知識。
文青必去嘅20間香港書店
1. 天地圖書
喺灣仔行街，又想行書局？一於去天地書店啦。呢間香港書店應有盡有，唔單止中英書籍俱全，仲有大量嘅社會科學書、翻譯作品、最新小說、非小說等。另外，天地亦都會定期舉辦展覽、新書發表會等活動，方便各位閱讀愛好者一齊聚一聚，分享心得。
天地圖書：灣仔莊士敦道30號地庫，電話：2865 0708
2. Taschen
嚟自德國嘅藝術書店 Taschen 已經進駐大館。你喺 Taschen 會搵到出自著名畫家同設計師嘅高質書籍，種類亦都非常廣泛，有寫真集、建築學、18禁、同性戀、野史、音樂、兒童書本，應有盡有。去完 Taschen 之後不妨同朋友喺附近食個午飯啦！我哋已經幫你搜羅咗中環一帶最正嘅午餐。
Taschen，中環荷李活道10號大館01-G02號舖，電話：2544 8018
3. Books & Co
座落喺半山嘅 Books & Co 係一間小型書店兼cafe。你可以嗌一杯咖啡，然後坐低靜心睇書。我哋鍾意 Books & Co 寧靜嘅環境，而且佢哋嘅職員好友善，願意俾客人坐幾個鐘，靜心閱讀。
Books & Co，半山柏道10號，電話：2559 5199
4. 比比書屋
比比書屋隱藏喺元朗，由一對信奉慢活嘅佛系情侶經營。呢間書店嘅特別之處在於客人每捐一本書，就可以換嚟店主親自煮嘅免費午餐，食材亦都係店主自家製作，好有心㗎。比比書屋淨係星期五六先開，所以大家出發之前記得留意返日子喇！
比比書店，錦田大江埔村67號，電話：5225 4119
5. 序言書室
呢間香港書店有中英文嘅文學書、哲學書、政治學書等，應有盡有。揭一揭序言書室入面豐富嘅學術書，都會覺得自己變咗古代儒生！店主希望締造一個舒服嘅空間，俾大家可以靜靜睇書，探討對宇宙嘅疑惑同心入面嘅各種糾結。
序言書室，旺角西洋菜南街68號7樓，電話：2395 0031
6. Kelly & Walsh
Kelly & Walsh 早喺 1870 年代已經喺上海開始活躍，而家更加擴闊版圖去到日本橫濱、新加坡同香港。由封面搶眼嘅時裝設計書，到平淡務實嘅文學經典，Kelly & Walsh 都可以滿足你對文化同學術嘅追求。我哋鍾意呢間書店溫馨又舒服嘅氣氛，分分鐘喺呢度 hea 足成日都得呀！
Kelly & Walsh，金鐘金鐘道88號太古廣場204號鋪，電話：2522 5744
7. 艺鵠
位於富德樓嘅獨立香港書店艺鵠出名收藏比較另類嘅書，包括寫真集、詩集同圖畫書。艺鵠亦都同時熱心推廣香港各區嘅文化活動同藝術展覽，係眾多文青嘅必到書店。
艺鵠，灣仔軒尼詩道365-367號富德樓14樓，電話：2893 4808
8. 莉莉書屋 (Lily Bookshop)
每當我哋想買二手書，莉莉書屋呢間獨立香港書店一定係我哋嘅首選。好難想像喺上環會有一間咁感覺隱世嘅書店呢？雖然店面唔大，佢哋嘅藏書量卻係非比尋常，周地都係關於歐洲歷史、中國文學同性別研究等等嘅二手書。所以呢度唔止係我哋鍾意嘅二手書店，更加係我哋可以脫離喧嘩嘅避風塘。
莉莉書屋 (Lily Bookshop)：上環皇后大道中189-205號啟豐大廈1樓F及G室，電話：2964 9483
9. Bookazine
雖然身為英式香港書店，Bookazine 都會努力支持香港本地嘅作家同作品。除咗紐約時報嘅暢銷書外，佢哋亦都有賣心意卡、料理書、擺設、零食等等，係一家人嘅週末好去處。
Bookazine 喺香港設有多間分店。
10. Kubrick
Kubrick 係大家培養品味嘅好地方，店入面有唔少電影原聲帶、非小說、黑膠唱片、家居雜誌等等。無論係 Fantagraphics 嘅圖像小說定係傳奇詩人北島嘅作品集，Kubrick 嘅收藏絕對唔會令各位書迷失望。另外，買完書嘅你仲可以喺連接住書店嘅 cafe 度一邊睇書，一邊嘆返杯咖啡添。
Kubrick，油麻地眾坊街3號駿發花園H2地舖，電話：2384 8929
11. Clark’s Comics
創立於1993年嘅 Clark’s Comics 不知不覺間已經變咗全港最大嘅漫畫批發商，除咗漫畫之外仲有模型同玩具任君挑選。由 Marvel 到 DC，佢哋集齊世界各地嘅熱門漫畫，受到眾多香港漫畫 fans 嘅熱愛。想買漫畫嘅話就幫襯 Clark’s Comics 啦！
Clark’s Comics，銅鑼灣糖街15-23號銅鑼灣中心地庫B7號鋪，電話：2890 7718
12. Parenthèses
位於中環嘅香港書店 Parenthèses 專門出售法文書（趁機告白 Guy Delisle 先！），有雜誌、教科書、旅遊書、圖像小說，甚至法國電影 CD。埋頭鑽研法文嘅各位，係時候嚟呢度買返本《小王子》同《異鄉人》喇！
Parenthèses，中環威靈頓街14-24號威靈頓公爵大廈2樓，電話：2526 9215
13. Vibe
呢間香港書店可以話係書迷同音樂迷嘅天堂！隱藏喺梅窩嘅 Vibe，前身叫做 Imprint，曾經因為鋪頭出面冇招牌而被稱為梅窩出名嘅「無名書店」。前老闆 Terry Boyce 喺2018年將 Imprint 轉讓俾 Gary Brightman 之後，新老闆就將書店改名做 Vibe，而且終於加返個招牌喇。呢度而家提供英文、中文、法文同其他唔同語言嘅暢銷書同新書，仲歡迎本地作家同作曲家喺呢度販賣佢哋自己嘅文學同音樂作品添。
Vibe，大嶼山梅窩銀礦中心大廈E號舖，電話：9088 2370
14. 誠品書店
身為台灣最出名嘅書店，誠品喺2012年拓展嚟香港，喺銅鑼灣起咗佢哋海外第一間分店。橫掃希慎廣場好幾層嘅誠品可謂應有盡有：文具、專門書、DVD，甚至係喫茶店。一唔留神，你可能已經喺誠品行咗半日。我哋亦都好鍾意幫襯誠品裏面嘅零售店，間唔中都會買一本 Moleskine 筆記或者一啲小飾物㗎。
誠品喺香港設有幾間分店。
15. Muse Art & Books
呢間香港書店座落喺佐敦嘅 Hotel Stage 裏面，為 The Muse 藝術同文化空間嘅一部份。除咗 Muse Art & Books 書店之外，呢個空間亦都包括藝廊、酒吧，同埋名為 Spotlight 嘅現場表演場地。喺 Muse Art & Books，你可以探索大量嘅書籍，由設計同攝影到詩集。搵到啱心水嘅書？比完錢之後就可以即刻去 Club Stage 嘅寧靜閱讀區，開始睇書喇。
Muse Art & Books：佐敦志和街一號 Hotel Stage，電話：3953 2213
16. Rebooked
Rebooked 係全港最大嘅二手英文童書店。由2019年成立起，呢度一至致力於宣傳書籍嘅可持續發展性，鼓勵家庭捐贈同購買優質嘅二手兒童同青少年書集。Rebooked 為香港讀者打造咗一個方便又實惠嘅平台，書籍起價低至$10，畀家長可以唔洗破費，就可以幫小朋友發挖佢哋對閱讀嘅興趣。
Rebooked：中環美輪街9-11號1樓，電話：6349 5025
17. 樂文 (Lok Man Rare Books)
等等先，大家冷靜，呢個 Lok Man 唔係你諗緊嗰個呀…… Lok Man Rare Books 係數一數二嘅知名香港書店。如果你想搵珍本同簽名版書籍，咁樂文就會係你嘅不二之選。呢間優雅嘅書店擁有一系列古籍書籍，包括世界各地著名作家嘅第一版同作品集。由古典到現代文學，到兒童小說、介紹美食同美酒嘅書、歷史同旅遊書，甚至到金融同體育書籍，樂文都應有盡有，簡直就係香港書蟲嘅寶庫。
樂文，中環贊善里6號，電話：2868 1056
18. 一拳書館
Book Punch 致力打造一個親切嘅社區空間，為深水埗附近嘅讀者提供一個閱讀烏托邦。特別嘅係呢間香港書店有出售中文同英文書，包括小說同科普類書籍。由於 Book Punch 嘅老闆本身係文學愛好者，你有好大機會可以喺書店入面搵到非主流嘅作品，所以如果你搵緊一本稀有嘅書，不妨去 Book Punch 試試運氣！
Book Punch：深水埗大南街169-171號大南商業大廈3樓
19. Seeds 兒童書店
Seeds 兒童書店熱衷於推廣親子互動閱讀，所以佢嘅店鋪入面堆滿咗各種兒童同青少年書籍。想培養小朋友嘅雙語能力？Seeds 有中文兼英文書籍，實幫到你！你亦都可以喺呢間 香港書店 搵到各類雙語作業同練習書。
Seeds 兒童書店：中環皇后大道中162號10樓，電話：2698 8939
20. 微塵書舍
位於屯門嘅微塵書舍雲集各種二手書、新書同小誌。除咗微塵書舍嘅一系列書籍之外，你都可以留意下佢哋嘅雜貨、文創物品同古物舊貨，試下尋寶，睇下有冇奇特嘅家居小擺設可以為你嘅安樂窩增添色彩。不過大家注意喇：微塵書舍只喺星期五晚上7點半至9點同星期六日中午12點至晚上6點營業。唔好摸門釘呀！
微塵書舍：屯門萬寶大廈商場1樓12號鋪，電話：5116 1825（Whatsapp）
[本文原於2020年10月出版，並於2024年由李綺婷更新。]
