由足底按摩到美容按摩，以下為你介紹10間全香港又抵又舒服嘅 spa～
每日返工都疲於奔命，搞到腰痠背痛？我哋明呀～一諗到出糧就可以去嘆翻個按摩，好好慰勞吓自己，已經爽定先啦～不過鍾意飲飲食食、得閒又染吓頭髮，搞到長期糧尾嘅話又點算先？大家唔使擔心，我哋 Honeycombers 以下就會為你誠意介紹以下10間價錢親民又高質嘅spa。通淋巴、針灸、香薰按摩、磨砂…… 全部都物超所值㗎！
一齊沈醉於以下全港最優質嘅按摩院
1. 大班公館
大班公館絕對係我哋最愛嘅香港按摩院之一。神秘嘅復古裝潢、等候室悠閒嘅背景音樂、剛柔適中嘅按摩…… 大班公館簡直就係一個迷你渡假勝地。開始按摩之前可以先飲杯茶、浸個足浴，然後再針對緊繃嘅肩頸、腳底同頭部進行按摩。肌肉嚴重痠痛嘅話可以考慮做50分鐘全身針灸療程。我們亦都好鍾意大班公館嘅薰蒸足療，幫助我哋促進新陳代謝。
想了解更多嘅話，不妨參考我哋英文版嘅大班公館點評啦！
大班公館，尖沙咀彌敦道83號華源大廈地庫，電話：2301 1990
2. Levo Spa
想體驗殿堂級嘅按摩享受？Levo Spa 嘅價錢可能比你想像中平。除咗星級 spa 同美容服務之外，專業嘅按摩師同高級嘅裝潢都係是 Levo Spa 嘅亮點。大家可以試吓佢哋嘅去壓按摩、排毒嫩膚 Levo 按摩或者平衡按摩。第一次去嘅話仲可以有7折添！
Levo Spa，中環威靈頓街50號華威大廈2樓A室，電話：9694 4389
3. 溢悅坊
做嘢做到肩頸膊痛需要救急？不妨試吓平價務實嘅溢悅坊啦。佢哋嘅穴位按摩能夠照顧到你全身各部位嘅需要。老練嘅按摩師亦都可以幫你進行深層排毒刮痧療程。唔單止做完按摩之後包保成個人鬆曬，收費仲十分之公道添。
溢悅坊，灣仔軒尼詩道156-162號利榮大樓7A室，電話：3487 0330
4. 足君好
想以優惠價享受優質腳底按摩嘅話，不妨預約足君好嘅狂歡時段療程啦（平日5點前，公眾假期除外）。價錢親民嘅按摩包括玫瑰浴鹽足底按摩、專業頭肩頸按摩同中式穴位推拿。佢哋嘅按摩師能夠快速了解每一位客人嘅需要，針對佢哋最痠痛嘅部位進行按摩。
足君好喺全港都有分店。
5. D’Varee
呢間按摩中心嘅兩位創辦人曾經喺五星級酒店嘅 spa 工作多年，提供多項按摩療程，特別係泰式同深層肌肉按摩尤其受歡迎。療程之後，D’Varee 仲會提供清新嘅香茅泡茶，服務好，性價比又高。你如果希望從頭到腳都進行改造，佢哋嘅臉部深層潔淨、美甲同蜜蠟脫毛都係唔錯嘅選擇。
D’Varee，灣仔軒尼詩道19-21號金鐘商業大廈4樓，電話：2591 1921
6. 知足樂
知足樂係香港反射療法嘅老字號，可以幫你舒緩腰痛、失眠、消化不良等等嘅症狀。佢哋拿手嘅按摩療程有藥理沐足腳底反射、淋巴推拿同古法泰式推拿，緩解你緊繃嘅肌肉。想要多啲私隱或者唔想出街？住港島區嘅你甚至可以享受上門服務，真係夠曬貼心。
知足樂，灣仔皇后大道東202號 QRE Plaza 7樓，電話：2573 3438
7. Ten Feet Tall
以為去酒店嘅 spa 先可以有優雅清靜嘅環境？咁又唔一定！Ten Feet Tall 嘅沙灘主題會俾你好似置身喺加州三藩市咁舒服。呢間咁正嘅按摩院，價錢竟然出奇地親民。你可以一邊瞓喺柔軟嘅梳化上面飲椰汁，一邊享受足底反射療法。單係咁靚嘅環境就足以令我哋愛上 Ten Feet Tall 喇！
Ten Feet Tall 喺中環同跑馬地都有分店。
8. Zen Massage
喺2014年開業嘅 Zen，而家已經擴展到有好幾間分店，為大家提供價錢相宜嘅高質按摩。呢度嘅按摩師非常之專業同有禮貌，會俾你有賓至如歸嘅感覺，而溫柔嘅燈光同薰衣草嘅幽香亦都會營造出令人放鬆嘅氛圍。除咗45分鐘腳底按摩之外，你亦都可以額外加多個15分鐘頸部同肩部按摩。另外，45分鐘泰式古法按摩都幾受歡迎，而如果你想試吓新嘢，可以揀有助於排毒纖體嘅磁叉通經絡舒緩按摩護理。
Zen Massage 喺港島有幾間分店。
9. Iyara Day Spa
需要恢復元氣？一於去 Iyara 放鬆一下啦。呢間 spa 提供傳統中醫按摩、推拿、深層組織按摩、運動按摩等等嘅療程，而如果你申請做埋會員嘅話，仲有多啲優惠添。仲有，唔好錯過佢哋嘅磨砂療程同埋超划算嘅美甲服務呀！
Iyara Day Spa 喺全港都有分店。
10. 足園
雖然足園有提供全身按摩服務，但係佢哋既然叫得做足園，咁就當然係腳底按摩嘅專家啦。任由你自己深陷喺舒服嘅軟凳上面嘆返個足底按摩同足浴，有助身心排毒。而雖然足園平時嘅價格已經好吸引，但係如果你喺會員專屬嘅 happy hour 嘅時候幫襯，就可以有更加多嘅優惠 —— 當然，個前提係你要先申請做會員啦！唔使擔心，呢度嘅會員資格係唔會過期添㗎。
足園喺灣仔同尖沙咀都有分店。
Le Spa by Jan （已結業）
想喺短暫嘅午餐時段放鬆心情嘅話，Le Spa by Jan 嘅30分鐘肩頸按摩可以幫你迅速驅走疲勞。呢個療程針對客人嘅頭肩頸穴位按壓，仲包埋足底按摩嚟緩解長期著鞋所帶嚟嘅痠痛添。
Le Spa by Jan，中環皇后大道中151-155號兆英商業大廈1502號室，電話：2815 3308
