搵緊香港嘅行山路線推介？以下15條遍佈港九新界同離島嘅行山徑一定會令你目不暇給！
無論你平時鍾意陽光與海灘、挑戰水上活動、定係遊歷香港四周嘅島嶼，香港有各式各樣嘅戶外活動俾大家嘗試，而我哋 Honeycombers 就認為週末去行山係一個唔錯嘅解壓方法嘞。以下集合咗香港15條風光明媚嘅行山徑（以地區排列），大家記得出門口之前帶齊裝備同足夠嘅飲料補充水分呀！
香港行山愛好者必到行山徑：九龍區
1. 獅子山
獅子山精神，就係香港精神，所以講起行山，又點可以唔提起獅子山呢？呢段路程一開始唔太難行，但係越上就會越令人越吃力，陡峭嘅梯級好似永無止境一樣…… 但係你知㗎啦，最艱苦嘅旅途往往會帶嚟最靚嘅景色，所以當然獅子山都唔會遜色啦，會俾成功嘅登山者鳥瞰九龍壯觀嘅全景。
路程：大約6公里
交通：喺黃大仙搭18M小巴出發，跟住喺慈雲山法藏寺落車，沿著路行上獅子山郊野公園入口
2. 飛鵝山行山徑
作為九龍第一高山，飛鵝山絕對係眾多香港市民嘅熱門行山地點。呢條行山徑一開始非常之平坦，適合初級登山者。但係如果你想去一去自殺崖嘅話，咁就另一回事喇。嗰度發生過唔少致命意外，所以請大家好好衡量自身嘅體力，千祈唔好高估自己呀。話雖如此，成功攻上自殺崖嘅話可以俯覽港九兩邊嘅美景，幾辛苦都係值嘅。
路程：大約6.8公里
交通：沿住彩虹地鐵站B出口外面嘅清水灣道行，到咗山腳之後向飛鵝山道後轉左然後直行
3. 大老山
大老山嘅徒步路線比較輕鬆，亦都係香港其中一條最獨特嘅小徑之一。呢條寬闊嘅步道一邊係九龍，另一邊就係新界西貢，可以俾登山者180度咁欣賞到香港山脈嘅壯麗景色，亦都當然唔少得秋冬時候盛放嘅芒草啦。不過，大家要注意喇：呢條小徑既係遠足徑又係馬路，所以行山嘅時候要小心有車駛過呀！
旅程：大約3.9公里
交通：鑽石山地鐵站C出口
香港行山愛好者必到行山徑：新界區
4. 蚺蛇尖郊遊徑
位於西貢東郊野公園嘅蚺蛇尖行山徑，雖然都幾有挑戰性，但係見到沿途嘅風光同水清沙幼嘅沙灘，乜辛苦都值啦！喺海拔468米嘅尖峰被譽為香港第一險峰，而登山客喺某啲地段更加需要手腳並用，所以大家最好著好對行山鞋同戴埋登山手套，避免喺泥土鬆軟嘅地方發生意外。
路程：大約12公里
交通：喺鑽石山地鐵站A1出口出面搭96R巴士，然後喺北潭凹落車（巴士淨係喺週末同公眾假期服務）
5. 龍蝦灣郊遊徑
去龍蝦灣郊遊徑欣賞清水灣嘅靚景啦！呢條路線嘅交通非常之方便，而且難度唔高，好適合一家大細一齊去。沿途有海蝕洞同小島等等嘅奇觀，唔少人亦都會喺空地上面放風箏。龍蝦灣郊遊徑對初級行山者嚟講係個唔錯嘅選擇。
路程：大約2.3公里
交通：喺鑽石山地鐵站D1出口外面搭91號巴士，然後喺清水灣第二灘落車
6. 釣魚翁郊遊徑
雖然釣魚翁係「香港三尖」之一，但係佢嘅郊遊徑冇大家想像中咁陡峭。登山客可以坐喺頂峰上面飽覽成個清水灣同鄉村俱樂部高爾夫球場嘅景色。就算你畏高都冇問題，因為你唔使上到山頂都可以享受唔少靚景。走之前，一定要去郊野公園外面嘅香港第一古天后廟啊！
路程：大約8.5公里
交通：喺鑽石山地鐵站C2出口外面搭91號巴士，然後喺五塊田落車
7. 元荃古道
由荃威花園開始嘅元荃古道係一條適合新手嘅行山路線，途中會經過青馬大橋同汀九橋。以往嘅鄉民會透過呢條路線將農作物由元朗運去荃灣市集，極具歷史價值。想休息一下嘅話不妨去田夫仔營地，食返個晏同補充水分之後繼續行程。
路程：大約12.5公里
交通：喺荃灣地鐵站外面搭84號綠色小巴去荃威花園
8. 屏山文物徑
屏山文物徑係全港第一條文物徑，完美保存咗昔日香港嘅樣貌，適合熱衷於歷史嘅登山客。不過，大家唔好因為「文物徑」呢三個字而睇小呢條行山徑呀。佢並非你想象中咁輕鬆，絕對需要足夠嘅體力嚟應付。另外，有二百幾年歷史嘅三圍六村亦係必到熱點，因為佢象徵著香港同鄧氏一族輝煌嘅過去。其他人氣地點包括香港第一古塔聚星樓、神聖嘅鄧氏宗祠、萬石堂等等。
路程：大約1.6公里
交通：到天水圍地鐵站之後喺E出口出閘
9. 烏蛟騰郊遊徑
烏蛟騰郊遊徑喺烏蛟騰群村開始，途中你會經過一啲村屋同一大片森林，係好多唔同種類嘅雀仔同野生動物嘅家園。呢條行山徑難度比較高，平均需要行成一個半鐘，但係喺夏天都唔算太辛苦，因為有樹蔭遮住個太陽，附近仲有涼爽嘅小溪，為路上增添咗唔少舒服陰涼嘅地方。最後，郊遊徑嘅終點站係一條已被遺棄嘅客家村，係香港隱藏嘅文化瑰寶。
路程：大約2.4公里
交通：喺港鐵大埔墟站B出口搭20R號巴士
10. 千島湖
千島湖亦都被稱為大欖涌水塘，無疑係香港被人影得最多嘅行山路段之一。喺晴朗嘅一天，天空嘅倒影反射喺湖面，周圍佈滿大大小小嘅島嶼，景色實在美不勝收。而且徒步嘅路程都大部分都幾平坦，仲有樹蔭添，比較適合行山嘅新手。
路程：大約3.9公里
交通：由屯門搭43號小巴，喺掃管笏村落車，然後沿著麥理浩徑嘅指示牌行
香港行山愛好者必到行山徑：港島區
11. 龍脊
香港最具標誌性同最受歡迎嘅遠足徑之一嘅龍脊，曾經被《時代》雜誌譽為亞洲最佳城市徒步徑，非常之值得去㗎！一路上微風習習，會穿過茂密嘅林地，沿途仲有蝴蝶同雀仔陪伴住你添。終點係喺開闊嘅山坡上面，佈滿野生杜鵑花同桃金孃，可以透淡氣之餘打一打卡。
另外，唔少人會行到去龍脊高處一個小山口放風箏，甚至用滑翔傘向廣闊嘅彼岸跳出去——最啱追求刺激嘅你！如果你係遠足新手，喺龍脊行山就會係一個唔錯嘅第一次。
路程：大約8.5公里
交通：由筲箕灣地鐵站A出口去筲箕灣巴士總站，搭9號巴士或者去石澳嘅小巴，喺在石澳道土地灣落車
12. 孖崗山衛奕信徑
相信各位行山愛好者都有聽過孖崗山啦。冇錯，就係嗰座令人「聞風喪膽」嘅孖崗山！佢無盡嘅樓梯超考腳力之餘，某啲路段仲要手腳並用，認真難行。不過，行孖崗山的確係一個好好嘅鍛煉，旅程仲會喺海灘終結，所以一切嘅一切都是值得嘅。大家可以先行紫羅蘭山，比較輕鬆，然後再去埋孖崗山，最後行到赤柱。如果你想挑戰自己，孖崗山就啱晒你嘞。
路程：大約4.8公里
交通：去到黃泥涌水塘花園之後再行去大潭水塘道，喺衛奕信徑嘅第一部分開始
香港行山愛好者必到行山徑：離島
13. 蒲台郊遊徑
呢條稍有難度嘅路線會帶你飽覽香港最南面嘅景色。蒲台島因為長年經歷風化而變得怪石嶙峋，沿途嘅「烏龜石」同「 佛手岩」並靠住懸崖，係蒲台島嘅地標。另外，你亦都可以自帶帳篷，喺遠離人煙嘅星空下渡過浪漫嘅一晚～走之前，記得試吓當地著名嘅海帶湯同買返啲特色乾海產返屋企呀。
路程：大約4公里
交通：由香港仔碼頭搭船大約一個鐘（逢星期一、三、五暫停服務）
14. 東澳古道
東澳古道雖然長，但係唔算難行，適合一家大細。沿途會經過1765年建成嘅楊侯古廟、樸實嘅水上屋、大澳文物酒店同大嶼山西北部海岸，具教育意義之餘亦都可以俾你感受舊漁港風情，放鬆一日。
路程：大約15公里
交通：喺東涌地鐵站B出口外面嘅巴士總站搭3M、11、23或者34號巴士。喺下嶺皮落車之後行去東涌砲台
15. 手指山行山徑
位於坪洲嘅手指山係老少咸宜嘅行山地點，而且只係需要45分鐘左右嘅路程就可以去到一個休息區，欣賞迪士尼樂園同青馬大橋嘅風景，所以係唔少香港家庭嘅週末好去處。大家記得要影返張相留念呀！
路程：大約7公里
交通：到坪洲碼頭之後跟住指示牌行
最後提提你，去戶外擁抱大自然固然係好事，但係都請大家要愛惜環境，並且記住補充水分同搽定太陽油，最緊要係量力而為啊！
