試咗幾間髮型屋都冇一間啱心意？要搵一個自己鐘意嘅專業造型師未必容易，但我哋親嘗咗以下15間髮型屋，一於幫緊你幫緊你！
疫情可能未算緩和，但係頭髮總要剪㗎！一個適合你嘅髮型能夠提升你嘅個人魅力，令到你喺社交場合成為全場嘅焦點。想剪個煥然一新嘅髮型？我哋 Honeycombers 團隊一於為你精選全香港15間最高質嘅髮型屋，包括迷你莎廊同大型連鎖髮型屋。無論你想簡單咁修剪頭髮定係想為特別日子改造一番，以下列出嘅15間髮型屋都係我哋嘅誠意推介。
香港至優質嘅髮型屋喺邊度？
1. Blonde Boudoir
喺蘇豪嘅 Blonde Boudoir 剪完頭髮之後，你嘅心情會同你嘅新髮型一樣咁靚！Blonde Boudoir 香港分店由德國人 Felix 主理，以佢二十幾年嘅造型師經驗帶領團隊，令到團隊手藝可以不斷提升。無論你想指定啲咩髮型或者髮色，Blonde Boudoir 團隊都能夠幫你打理好。除咗有專業嘅服務，職員都好友善。呢度仲提供咖啡、雞尾酒等等嘅飲品同唔同類型嘅雜誌俾客人免費享用。
想了解更多嘅話，可以參考我哋嘅 Blonde Boudoir 點評（英文版）。
Blonde Boudoir，中環閣麟街13-17號國麟大廈8樓，電話：6804 5737
2. La Provence Hair Salon
呢間迷你髮型屋隱藏喺愉景灣入面。為咗凸顯每個客人嘅個人特色，店主 Isaac 都會細心評估客人嘅膚色同臉型，從而設計出合適嘅髮型。另外，店入面長期擺放住最新嘅潮流雜誌，有舒適嘅空間。幾個鐘，眨吓眼就過啦！
La Provence Hair Salon，愉景灣愉景廣場C座五樓522室，電話：6621 2517
3. Aveda
信奉印度 Ayurveda 教條嘅 Aveda 一直都堅持使用純淨嘅有機產品。由於佢哋嘅品牌使命係保護生態，因此無論係頭髮打理定係身體護理，Aveda 都淨係會沿用可持續性產品。
想了解更多嘅話，不妨睇睇我哋嘅 Aveda 點評（英文版）。
Aveda 喺香港各區都有分店。
4. Toni & Guy
成立於2013年嘅 Toni & Guy，旗下嘅 Toni & Guy Academy 都出咗唔少高徒，一直以嚟都用最頂級嘅產品同專業嘅手藝服務客人。佢哋唔單止會為你打造專屬嘅髮型，仲會結合埋最新嘅潮流為你訂製個性造型。除咗喺中環2021年尾新開嘅旗艦店之外，Toni & Guy 集團嘅髮型屋更加遍佈全球，多年嚟贏得唔錯嘅口碑。
Toni & Guy，中環雲咸街15號地舖，電話：2191 9819
5. Love Hair
定位為中環迷你髮型屋嘅 Love Hair 其實係一間熱心減低碳排放嘅企業，除咗堅持用天然產品之外，佢哋亦都會將污水過濾重用。Love Hair 嘅造型師團隊嚟自全球各地，例如香港、英國、紐西蘭、澳洲等等。呢度嘅環境溫馨怡人，內部裝潢亦都非常之摩登。
想了解更多嘅話，歡迎參考我哋嘅 Love Hair 點評（英文版）。
Love Hair，中環威靈頓街99F號1樓，電話：2458 0190
6. Salon Chandler
由著名造型師 Shayne Chandler 創辦嘅 Salon Chandler 提供一站式服務，喺短短幾個鐘內就可以將客人變得煥然一新。店鋪位於蘭桂坊，服務範圍包括洗剪吹、染髮、深層護理、直髮、駁髮、Keratin 角蛋白護理等等。Salon Chandler 一流嘅頭部按摩同熱情嘅客戶服務，令到呢間髮型屋成為我哋心目中嘅不二之選。
想了解更多嘅話，可以參考我們的我哋嘅 Salon Chandler 點評（英文版）。
Salon Chandler，中環德己立街17-19號德和大廈14樓，電話：2537 3737
7. Shhh
想要專人為你打造獨一無二嘅剪髮同護髮體驗？位於中環嘅 Shhh 能夠幫你。呢間髮型屋只會接受預約，而所使用嘅產品亦都要經過創意總監 Marvin Lin 嘅精挑細選。Shhh 團隊曾經服務過唔少世界各地嘅大明星同皇室成員，由此可見，佢哋嘅造型技術絕對值得信賴。
想了解更多嘅話，可以參考我哋嘅 Shhh 點評（英文版）。
Shhh，上環荷李活道94號地舖，電話：2915 1001
8. Hair Do
如果你想享用最高質嘅日本理髮產品同染髮劑嘅話，下次剪頭髮，就去 Hair Do 啦！前身為「Chicca」嘅 Hair Do 喺2022年初改頭換面，喺中環開咗 Hair Do 1st 同喺銅鑼灣開咗 Hair Do 2nd。呢間連鎖髮型屋提供友善嘅服務同氣氛，所以一直以嚟都擁有唔少回頭客。團隊大多數都係日本人，擅長幫客人打造最潮嘅日系髮型。如果客人唔滿意自己新嘅 look，佢哋甚至可以喺一個星期之內要求改款，認真夠曬體貼！
Hair Do 喺中環同銅鑼灣都有分店。
9. Kimrobinson
位於中環同銅鑼灣嘅高級髮型屋 Kimrobinson，最受歡迎嘅服務係乾剪。其他服務包括無縫層次、多層次染髮、頭髮修護等等，可以修補客人因為長期染髮或者不良生活習慣導致嘅髮質受損。
Kimrobinson 喺中環同銅鑼灣都有分店。
10. Private i Salon
1996年成立嘅 Private i Salon 足跡遍佈全港，有好幾間分店。佢哋嘅團隊都用 Milbon & Lebel Cosmetics 等日系專業頭髮造型嘅產品，會比起其他歐美品牌更加適合我哋亞洲人嘅髮質。除咗頭髮護理，Private i Salon 亦都有提供美甲同化妝服務㗎！
Private i Salon 喺香港各區都有分店。
11. Il Colpo Group
作為香港數一數二嘅豪華沙龍，Il Colpo Group 自1987年以嚟一直都受到唔少明星追捧。佢哋唔單止喺香港有分店，喺中國內地好多省份亦都有分店添。除咗走喺潮流尖端嘅髮型設計服務之外，你仲可以在佢哋嘅各間商店入面享受美甲同 spa 添！
Il Colpo Group 喺香港各區都有分店。
12. Red Hill
Red Hill 喺各種髮型設計方面都做得好出色，而佢哋嘅染髮服務更加係亮點之一。屢獲殊榮嘅造型師團隊可以為你提供你想要嘅任何髮色，仲有 NuWave 同 Kerasilk 等等嘅附加服務。想試一個全新嘅造型嘅話，即管包喺 Red Hill 身上啦！
Red Hill，九龍城賈炳達道128號九龍城廣場LG層16-17號舖，電話：2383 8829
13. Indulgence
想完全放鬆身心，獎勵一下自己嘅大家不妨去 Indulgence。由簡單嘅洗剪吹，到奢華嘅巴西角蛋白護理，你所有的頭皮同頭髮護理都會受到最貼心嘅照顧。另外，Indulgence 同時係一間水療中心，俾你可以輕鬆享受面部護理、腳底按摩或者全身按摩，幫你恢復活力。
Indulgence，中環威靈頓街1號荊威廣場22樓，電話：2815 6600
14. Hair Culture
自1999年開業以嚟，Hair Culture 已經將佢嘅業務由香港擴展到台北（甚至多倫多！），係好多明星嘅首選髮型屋。你可以決定由造型師或者老闆本人為你訂製髮型。服務包括頭髮護理、染髮同燙髮，另外可以預訂專業嘅化妝同美甲服務添！
Hair Culture 喺尖沙咀同中環都設有分店。
15. LaB Salon & Beauty（暫時停業）
無論係頭皮護理定係新娘造型，paimore digital 定係挑染，LaB Salon & Beauty 都可以幫你煥然一新。LaB 由專業嘅韓國髮型師掌舵，提供一系列專注於改善髮質嘅服務。一般洗剪吹只需要$300起，令 LaB 成為香港其中一間最實惠又優質嘅韓國美髮店。
LaB Salon & Beauty，銅鑼灣駱克道496-498號合亞大廈3樓，電話：2363 1999
O2 Hair Studio（已結業）
由 Rudy Prevost 帶領嘅 O2 Hair Studio 提供各色各樣嘅服務，由簡單嘅洗剪吹、男女老幼嘅造型設計，到繁複嘅染髮、深層護髮等等都有專人負責。O2 Hair Studio 自1997年開業以嚟一直為蘇豪嘅顧客提供優質嘅頭髮護理同造型。呢度環境溫馨，係我們最鐘意嘅髮型屋之一。
想了解更多嘅話，可以參考我哋嘅 O2 Hair Studio 點評（英文版）。
O2 Hair Studio，中環蘇豪華賢坊17號，電話：2529 6289
