幫人慶祝生日抑或特別日子？我哋搜羅咗以下高質嘅蛋糕店，總有一間幫到你！
雖然我哋好鍾意食香港嘅點心、雪糕同墨西哥菜，不過試問有啲咩比得上一件殿堂級嘅蛋糕？所以，我哋走勻全港，親自揀咗以下15間蛋糕店，由打卡一流嘅 cafe 到五星級酒店，保證色香味俱全。快啲睇吓你想試邊件蛋糕啦！
全香港最正蛋糕店特輯
1. Sugar Me Kissery
想買個 3D 造型蛋糕嘅話，Sugar Me Kissery 會係一個好選擇。呢間蛋糕舖嘅創辦人係一位得獎甜品大師，專門整外型獨特嘅蛋糕，有創意之餘味道都好高水準。無論你想要幾別樹一幟嘅蛋糕，一班大師都會為你絞盡腦汁幫你訂製。我哋見過 Sugar Me Kissery 最神奇嘅蛋糕係一個懸空嘅 Hermes 紙袋，裡面啲嘢跌晒出嚟㗎！
Sugar Me Kissery，大角咀必發道83號，電話：6110 8967
2. La Famille
唔知大家仲記唔記得喺2014年左右，La Famille 只係一間喺大坑嘅小店呢？冇錯，我哋絕對係佢嘅元祖級 fans！所以當呢間蛋糕店後來擴展到喺全港有成十間分店嘅時候，你可以想像到我哋有幾開心啦。La Famille 嘅戚風蛋糕好受歡迎，無論係皇牌士多啤梨蛋糕、香濃嘅雙重朱古力蛋糕，定係我哋最鍾意嘅日本柚子蛋糕，都不容錯過。另外，呢間蛋糕舖有賣打卡一流嘅巴伐利亞蛋糕（bavarois），仲會時不時推出期間限定嘅商品添。最後，La Famille 每個月都會舉辦生日之星活動。如果你嘅生日撞正舖頭喺 La Famille 社交媒體上面公布嘅日子，你就有機會贏得一個戚風小蛋糕。祝你好運！
La Famille 喺全港有多間分店。
3. 65.cakes
可愛嘅風格、栩栩如生嘅卡通人物…… 65.cakes 絕對係充滿創意嘅一間香港蛋糕店，自2019年嚟一直推出最得意、最色彩繽紛嘅蛋糕。你可以訂造各款造型同風格嘅蛋糕，由經典嘅卡通人物到哈利波特都有，包保與眾不同！
喺 Instagram 訂購 65.cakes 嘅蛋糕。
4. The Cakery
想食得健康啲，但係又想食甜嘢？The Cakery 專門整無麩質、全素、無糖等嘅甜品，仲用好多奇亞籽呢類有機超級食材，等你食完蛋糕都冇咁大罪惡感。佢哋嘅人氣產品包括巨型太陽花蛋糕（南瓜海綿蛋糕配黑朱古力）、Aloha（無麩質海綿蛋糕面頭有原塊菠蘿切片同厚厚嘅蛋白霜）同埋 Hidden Gem（無麩質黑芝麻蛋糕，上面有一朵黃色好大嘅花）。一個字：正！
The Cakery 喺港島有幾間分店。
5. Butter
講起 Butter，我哋除咗會諗起 BTS 防彈少年團嘅名曲之外，我哋仲會諗起 Butter Cake Shop 美味濃郁嘅蛋糕。有經典嘅紐約芝士蛋糕到人見人愛嘅 s’mores 蛋糕，Butter 嘅各種蛋糕同果派將係每個 party 嘅焦點，包保你哋食到停唔到口呀！
Butter Cake Shop 喺全港有幾間分店。
6. Jouer
睇 Jouer 嘅特色蛋糕都知佢哋啲師傅幾玩得啦。Jouer 嘅法式甜點固然高質，但係佢哋嘅蛋糕先係真正令人流連忘返。Jouer 嘅招牌蛋糕融合各種平民小食，例如香蕉拖肥、朱古力棉花糖等等，但係整出嚟嘅成品又極之高貴。如果你想再食多啲甜品，Jouer 嘅馬卡龍同貝殼蛋糕都好值得一試㗎。
Jouer，銅鑼灣恩平道28號利園二期LG樓23號舖，電話：3489 3903
7. Vive Cake Boutique
Vive Cake Boutique 係甜品愛好者嘅天堂。充滿少女心嘅蛋糕外型令人唔捨得食之餘，加埋鋪頭入面粉紅色嘅裝潢，啱晒你喺 IG 打卡。如果你去 Vive，記住要試吓佢哋嘅獨角獸蛋糕同美人魚尾蛋糕啊！
心郁郁想試？歡迎參考我哋呢篇 Vive Cake Boutique 點評（英文版）。
了解更多關於 Vive Cake Boutique。
8. Infiniti C
Infiniti C 除咗啲蛋糕味道特別之外，仲好顧及無麩質、全素同生銅飲食嘅食客。上圖藍色嘅玫瑰蛋糕係最熱賣嘅蛋糕之一，唔知你喺 IG 有冇見過呢？無論係巴西莓乳酪味定抹茶枸杞味，你一定可以喺 Infiniti C 試到啲新奇嘅蛋糕味道。
Infiniti C 喺全港都有分店。
9. Jomo
Jomo 出名賣全素甜品。佢哋嘅雪芳蛋糕外脆內軟，面頭有一層厚厚嘅忌廉，更有網民讚係全港最正。喺 Jomo 將軍澳店樓上，客人可以喺佢哋嘅 gym 做完運動之後落去食件蛋糕獎勵自己。同場仲有個靚爆海景添！
Jomo，將軍澳唐俊街23號 Monterey G01 & 1A，電話：2331 3003
10. 芝樂坊餐廳（The Cheesecake Factory）
自70年代喺美國比華利山成立以嚟，芝樂坊餐廳 The Cheesecake Factory 受到全球蛋糕愛好者多年嘅愛戴。鋪頭有超過30款唔同口味嘅甜品俾你揀，例如士多啤梨芝士蛋糕、南瓜芝士蛋糕、Godiva 朱古力布朗尼新地、蘿蔔蛋糕等。佢哋仲有提供牛扒同沙律等嘅主食，俾你食甜品之前填飽嘅肚。
芝樂坊餐廳，尖沙咀廣東道25號港威商場 G102號舖，電話：2791 6628
11. Lady M
估計你應該聽過 Lady M 出名賣千層蛋糕㗎啦！一塊塊 crepe 之間夾住鮮甜嘅奶油，帶出獨特嘅鬆軟口感。Lady M 有好多唔同口味嘅蛋糕，好似抹茶、椰子、焦糖海鹽同玫瑰。除咗千層蛋糕之外，佢哋嘅士多啤梨蛋糕同香蕉千層酥都係唔錯嘅選擇。
Lady M 喺全港有多間分店。
12. Date by Tate
講到香港最有特色嘅蛋糕，點少得呢間位於上環嘅 Date by Tate 呢？創辦人話，每一件蛋糕好比一首詩，奪目嘅造型背後有各自嘅意義。啲精品蛋糕夠晒獨特又好味，啱晒買嚟慶祝重要日子，俾啲親朋戚友打吓卡。
Date by Tate，上環荷李活道210號地舖，電話：6730 2494
13. Sbakery by Mama Soo
鍾意食道地 New York Cheesecake 嘅你，一定唔可以錯過美式芝士蛋糕專門店 Sbakery by Mama Soo！呢間香港蛋糕店以網店方式營運嘅時期已經吸引咗唔少忠粉，而家喺上環嘅實體店更享受唔少人氣。無論係經典嘅原味同藍莓味，定係創新嘅提拉米蘇同 s’mores 口味，Sbakery 嘅紐約芝士蛋糕都擁有豐富絲滑嘅口感，所以大家唔好俾佢樸素嘅外表呃咗呀——其實裏面十分之足料，非常值得一試！
Sbakery by Mama Soo：上環太平山街22-24A號地下B室
14. Le Dessert
想食正宗法國甜品？不妨試吓 Le Dessert！由法籍甜品大師 Chef Julian 創辦嘅 Le Dessert 主打精緻嘅傳統法式甜點。招牌產品有 Charlotte Celebration 蛋糕，入面由鬆軟嘅海綿蛋糕同絲滑嘅慕斯組成，再以一排手指餅裝飾，造型大方得體，適合任何場合。
了解更多關於 Le Dessert。
15. The Bakerism
The Bakerism 主打北海道奶油蛋糕，係必食嘅香港蛋糕店之一。佢哋嘅蛋糕採用新鮮時令食材同由日本中澤進口嘅鮮奶油製成。招牌口味當然唔少得最受歡迎嘅宇治抹茶麻糬蛋糕，仲有 Oreo 焦糖蛋糕同豪華朱古力香蕉蛋糕。The Bakerism 亦都會推出限時口味，記得留意吓佢嘅社交媒體專頁喇。
The Bakerism：尖沙咀金巴利道68號地下C室，電話：6284 5997
[本文原於2020年12月出版，並於2024年由李綺婷更新。]
