生活壓力山大，又未有時間去旅行？試吓去呢幾間酒店 staycation，即使唔離開香港半步，都可以幫你感覺煥然一新！
雖然我哋超想去泰國華欣、日本沖繩同毛里求斯度假，但係礙於全球疫情肆虐，睇嚟都未有咁快可以隨便出國旅行㗎喇…… 好彩，喺香港度假其實都別有一番體驗。以下就集合咗我哋 Honeycombers 團隊最鍾意去 staycation 嘅香港酒店，仲有最好味嘅酒店 brunch。大家一於執齊行李，準備出發啦！
注意：以下嘅酒店有可能係指定檢疫酒店，暫時未開放俾公眾入住，大家落訂之前，記得 check check 呀～
香港 staycation 高質酒店推介
1. 香港柏寧酒店 (The Park Lane Hong Kong, A Pullman Hotel)
有得玩，有得食，仲有靚景兼超級舒適嘅按摩體驗——柏寧酒店可以一次過滿足晒你所有願望！位於銅鑼灣嘅 Park Lane Hotel 有絕對優越嘅地理位置，即使喺正市中心，都享有維港同維園嘅全景，係一個真真正正嘅城市綠洲。呢間酒店會定時推出唔同嘅 staycation 套裝，有適合一家大細嘅，例如今年仲夏嘅「泡泡釣魚樂」同「Ryze 彈床樂園」親子住宿計劃；亦有比較舒服靜態嘅，比如「Pullman x Ogawa 舒壓假期」同埋我哋親自體驗過嘅「Ogawa 豪華套房體驗」！由夢幻泡泡浴到房內私人按摩椅，由 art jamming 即興繪畫班到天台瑜伽班，活動應有盡有，包保小朋友們可以盡情放電，各位大朋友都可以玩得盡興、放鬆身心。
另外，鍾意佳餚美酒嘅你亦都唔可以錯過柏寧酒店嘅多種餐飲選擇，包括 Playt 自助餐餐廳、大堂酒廊裏面提供輕食嘅 Ebb & Flow、供應 free-flow 飲料同小食嘅行政酒廊，以及天台酒吧同餐廳 Skye。大家喺享用美食同特調雞尾酒嘅同時，仲有動人景致坐鎮，簡直物超所值！
香港柏寧酒店，銅鑼灣告士打道310號，電話：2293 8888
2. 香港瑰麗酒店 (Rosewood Hong Kong)
香港瑰麗酒店自 2019 年開業以嚟一直人氣高企。由創新嘅藝術展覽到奢華嘅住宿，酒店舒適嘅空間會幫你脫離城市嘅喧囂。瑰麗酒店嘅綜合康體設施 Asaya 係亮點之一。你可以盡情享用按摩、TRX 設施、水療浴池同餐廳 Asaya Kitchen，而駐店嘅康體專家亦都致力全面照顧你嘅身心健康。另外，行政廊瑞閣嘅管家服務、Darkside 酒吧嘅現場爵士音樂同彤福軒嘅順德菜都係呢間酒店嘅特色。瑰麗酒店嘅 staycation 一定唔會令你失望！
香港瑰麗酒店，尖沙咀梳士巴利道 18 號 Victoria Dockside，電話：3891 8888
3. The Hari
座落灣仔同銅鑼灣之間嘅 The Hari，係一間喺疫情期間 2020 年 12 月開業嘅酒店，雖然係一個大膽嘅嘗試，但對我哋呢班鍾意 staycation 嘅香港人嚟講，就絕對係一個好消息！呢間時髦嘅精品酒店具有輕鬆又舒適嘅氛圍，但其中不失高雅，甚至有唔少奢華嘅點綴同設計。The Hari 嘅尊貴客房有巨大嘅落地玻璃窗，俾你飽覽呢座城市嘅景致。而位於頂樓嘅套房就更加豪華，佔地超過 800 呎。喺飲食方面， The Hari 嘅酒店餐廳有 Zoku 同埋 Lucciola，兩者都以最高嘅品質同品味為客人提供服務。
The Hari，灣仔駱克道 330 號，電話：2129 0388
4. 香港逸東酒店 (Eaton HK)
位於佐敦嘅逸東酒店比較低調，但係絕對高質！酒店泳池喺頂樓，外圍仲有幾隻紅火鶴，係唔少 KOL 嘅熱門打卡位。除咗人氣酒吧 Terrible Baby 之外，酒店入面仲有米芝蓮一星餐廳逸東軒，大家不妨去試吓佢哋嘅招牌菜。
香港逸東酒店，佐敦彌敦道 380 號，電話：2710 1866
5. 奕居 (The Upper House)
隸屬於太古集團嘅奕居展現出豪華嘅時代氣息，喺繁忙嘅金鐘地段提供寧謐嘅休憩空間。奕居係本地著名設計師傅厚民嘅作品，而遍佈酒店嘅藝術品更加進一步提升咗空間嘅奢華品味。寬敞嘅房間入面配備咗摩登嘅傢俱，太平山頂同維港嘅美景盡入眼簾。Check out 之前，記得要去露天酒吧 The Lawn 飲翻幾杯特色雞尾酒先啊！
奕居，金鐘金鐘道 88 號太古廣場，電話：2918 1838
6. 大澳文物酒店 (Tai O Heritage Hotel)
前身為警署嘅大澳文物酒店喺 2010 年經歷咗大型嘅翻新工程，搖身一變成為而家富有殖民時代色彩嘅精品酒店。頂樓嘅舊警署站崗被改造成為餐廳，大家可以一邊食嘢一邊欣賞漁港景色。而潔白雅緻嘅建築入面就只有九間客房（所以好難 book 㗎），俯覽怡人嘅海景同靜謐嘅山丘。客房同時具備當代同埋傳統嘅風格，客人可以透過牆上嘅相窺探昔日嘅大澳漁村。經過今年夏季再一次嘅優化工程之後，房間雖然轉為以柔和嘅大地色系作為主調，並且配上水藍色嘅家具，但係依然保持住優雅嘅風格，係香港 staycation 嘅好去處。
想知道大澳有咩好玩？睇吓我哋嘅大澳一日遊英文介紹啦！
大澳文物酒店，大澳石仔埗街，電話：2985 8383
7. W Hong Kong
如果你想喺無邊際泳池暢泳，再喺一流嘅水療中心享受豪華按摩嘅話，不妨入住 W Hong Kong。呢間五星級酒店裏面，差唔多每間房都可以欣賞到城市嘅壯麗景色。我哋亦都係 W 酒店 brunch 嘅忠實粉絲嚟㗎！
W Hong Kong，西九龍柯士甸道西 1 號，電話：3717 2222
8. 香港九龍貝爾特酒店 (pentahotel Hong Kong, Kowloon)
採用歐式設計嘅香港九龍貝爾特酒店係一間鄰里酒店，為個人同埋商務賓客提供型格、休閒嘅空間。呢度有友善嘅職員、熱鬧嘅遊戲室、舒適嘅泳池同令我哋流曬口水嘅美食，其中記得試吓佢哋用本地特色食材製造嘅披薩呀！
想更深入了解香港九龍貝爾特酒店嘅話，可以睇睇我哋嘅英文點評。
香港九龍貝爾特酒店，新蒲崗六合街 19 號，電話：3112 8222
9. 香港嘉里酒店 (Kerry Hotel, Hong Kong)
香港嘉里酒店嘅無邊際海景泳池係酒店嘅招牌，迎面而來嘅微風會俾你喺鬧市之中得以憩息。我哋唔單止鍾意呢度摩登簡潔嘅客房，呢間酒店嘅 spa 亦都係我哋喺本地試過最舒服嘅按摩之一，推薦大家一試。
睇睇我哋鍾意香港嘉里酒店嘅五大原因啦！
香港嘉里酒店，紅磡灣紅鸞道 38 號，電話：2252 5888
10. 香港美利酒店 (The Murray Hong Kong)
鍾意雅緻生活嘅各位，美利酒店嘅 staycation 絕對會係你嘅首選。除咗豪華嘅海景客房之外，你亦都可以享受唔同嘅餐飲體驗，例如頂樓歐陸餐廳兼酒吧 Popinjays、優雅寫意嘅 Garden Lounge，仲有米芝蓮一星餐館國福樓等等。無論你揀去酒店嘅山景健身房，定係單純留喺套房入面著住件絲絨浴袍煲劇，呢個香港宅度假都會係完美嘅享受。
香港美利酒店，中環紅棉路 22 號，電話：3141 8888
11. 香港維港海悅尚萃酒店 (Hyatt Centric Victoria Harbour Hong Kong)
維港海悅尚萃酒店嘅地理位置絕佳，交通方便之餘附近亦都有唔少 shopping 好去處，但係同時又具備遠離鬧市嘅寧靜空間。酒店嘅特色包括無邊際海景泳池、天台酒吧 Cruise、VR 健身儀器、自助客房登記櫃檯等等。The Farmhouse 嘅晚市自助餐更加每次都令到我哋捧腹而歸！
香港維港凱悅尚萃酒店，北角北角邨里 1 號，電話：3762 1234
12. 香港數碼港艾美酒店（客房即將重新開放）
香港數碼港艾美酒店目前正處於客房修繕嘅最後階段，我哋都非常之期待重返呢間酒店宅度假呀！ 無論你係想同摯愛度過一個浪漫嘅周末，定係同家人換個環境放鬆吓，數碼港艾美酒店都係唔錯嘅選擇。喺泳池邊曬曬太陽，或者探索呢度全新嘅餐館同酒吧，包括提供 all-day dining 嘅 Southside Bistro、中菜館南坊、日本餐廳 Umami，同埋咖啡廳兼酒吧 Latitude 22。
香港數碼港艾美酒店，數碼港數碼港道 100 號，電話：2980 7000
