想重新佈置屋企？無論你係想選購新傢俬、裝飾品定係家品雜貨，去我哋以下嚴選嘅家具店就啱喇！
身為室內設計愛好者，我哋鍾情於絲絨梳化、摩登嘅燈飾同北歐風嘅家具。雖然我們好鍾意行一般嘅生活用品店，但喺選購傢俬方面， 我哋就有更加高嘅要求喇！如果你正喺度計劃緊搬屋或者改造房間，你就一定要繼續睇吓以下我哋為你搜羅咗嘅全港最優質家品店，適合喜好各異嘅大家。
想全面改造家居？睇睇我哋特選嘅香港高質傢俬店
1. Hush Home
對於忙碌嘅都市人嚟講，冇咩比起充分嘅休息同睡眠更為重要！Hush Home 旨在透過五星級嘅睡眠改善每個人嘅健康，以最合理嘅價格提供一系列優質床上用品同家具。由舒適嘅床墊到超柔軟嘅埃及長絨棉再到實木床架，所有產品都喺美國三藩市設計同測試，並且採用可持續發展同最高品質嘅天然材料。Hush Home 甚至會組織唔同嘅活動，分享團隊對睡眠嘅研究，幫大家了解睡眠嘅科學之餘，可以瞓得更加好，為你嘅每一日注滿活力！
Hush Home，上環干諾道西28號威勝商業大廈2樓07室，電話：3500 9475
2. Ziinlife
講到香港嘅傢俬舖，你未必會第一時間諗起 Ziinlife，但係佢哋絕對係我哋最愛嘅家具店之一！嚟自上海嘅 Ziinlife 價格親民，俾大家都可以輕鬆選購平靚正嘅家居產品。另外，Ziinlife 擅長製造線條乾淨俐落、設計獨特嘅傢俬，受到唔少室內設計愛好者嘅歡迎。
Ziinlife，觀塘觀塘道398號 Eastcore 606室，電話：2180 8015
3. Ikea 宜家家居
宜家家居唔止得個 marketing 出色㗎——佢哋仲具備各式各樣嘅北歐風傢俬同生活雜貨，價錢又經濟實惠，抵佢哋咁受歡迎！我哋特別鍾情於佢哋嘅 Kallax 儲物櫃、Malm 床架同時尚嘅地毯。成本有限但係又想改造家居嘅話，宜家家居會係你嘅不二之選。
Ikea 宜家家居喺全港有多間分店。
4. TREE
講到香港嘅傢俬店，你一定會識得 TREE。呢個家品牌子多年嚟致力用環保核桃同橡木重新製作或者循環再造傢俬，而且仲會將部分嘅收益捐俾慈善機構 Trees4Trees，幫助保育印尼嘅森林。大家不妨為環保出一分力，支持 TREE 嘅環保傢俬。
TREE 喺鴨脷洲同沙田都有分店。
5. Indigo Living
想訪客感受到你嘅家居品味？選購 Indigo Living 嘅設計師傢俬就啱嘞。由懷舊風嘅皮革傢俬到優閒座椅到顏色亮麗嘅絲絨梳化，Indigo Living 嘅時尚家品同獨特嘅擺設一定唔會令你失望。
Indigo Living 喺香港有幾間分店。
6. Heveya®
一張舒服嘅床褥絕對能夠提升睡眠質素。Heveya®（前身為 Okooko by European Bedding）唔單止可以幫你揀選最啱你嘅床褥，佢哋仲致力保護環境，用可持續性物料製造唔同嘅有機乳膠床褥同環保床架。各位可以去佢哋位於中環嘅 showroom，親自體驗吓唔同款嘅床褥，順便買返幾張床單。另外，Heveya® 經常都會推出新系列，而佢哋嘅職員亦都幾友善㗎——唔信嘅話，大家可以睇吓佢哋喺 Google 嘅五星評價！
Heveya®，中環德己立街21號 The Plaza LKF 13樓，電話：6286 1132
7. BoConcept
如果你鍾意簡約時尚嘅家居風格，咁你就一定要睇睇 BoConcept 嘅傢俬同家品系列喇。由梳化到餐枱，到吧凳甚至床架，呢個丹麥家居品牌嘅產品都會令你眼前一亮。雖然 BoConcept 嘅價位偏高，但係佢哋嘅家具保證能夠俾你全新嘅家居佈置靈感。
BoConcept 喺香港有幾間分店。
8. Decor8
潮流地毯、絲絨腳凳、摩登燈飾…… 鍾愛活潑俏皮風嘅話，Decor8 一定可以幫你打造你理想嘅家居。
Decor8 喺旺角同灣仔都有分店。
9. Alot
鍾意乾淨俐落的家品？你絕對唔可以錯過 Alot（After Life Of Tree），一個北歐風嘅傢俬品牌。我哋尤其鍾愛佢哋嘅 Klad 凳、Lock 吧凳同埋 Spot 咖啡枱。
Alot 喺香港有幾間分店。
10. Manks
由古董到設計師單品，Manks 嘅傢俬非常之重視現代設計美感。如果你搵緊北歐風傢俬嘅話，不妨望望佢哋嘅 Nanna Ditzel Trinidad 同 Fritz Hansen Swan 凳。雖然 Manks 嘅產品屬於中高價位，但係對於重視家居品味嘅人嚟講，呢個將會算係唔錯嘅投資。
Manks，黃竹坑香葉道30號長德工業大廈14樓，電話： 2522 2115
iDecorate（已結業）
喺 IG 睇上某款50年代嘅絲絨梳化，但係又唔知喺邊度買得到？iDecorate 嘅產品絕對能夠滿足品味高尚嘅你。無論你想要型格嘅 bar cart 定係復古燈，iDecorate 都會有你心目中嘅理想傢俬。另外，iDecorate 嘅網購系統亦都非常之易用，方便你就算賴喺屋企都可以輕鬆 shopping！
喺網上訂購 iDecorate 嘅家具。
