想養隻貓，養隻狗，當做情人？即管去呢幾間香港動物領養機構，為你屋企添加新成員啦！
奔波勞碌咗成日，返到屋企有個伴俾我哋嗲吓縱吓，相信係唔少香港人嘅夢想～但係畢竟對寵物嘅承諾係一生嘅，所以都有唔少人會卻步。不過，如果你真係準備好領養動物嘅話，香港的確有唔少動物收容所同救援組織需要你㗎！無論你已經認定自己為虔誠嘅貓奴，樂於一世為貓咪按摩，定係希望有隻狗狗可以陪你放假行山，一齊過活，以下就係你可以喺香港領養動物嘅最佳場所。記住：支持領養，兼且要諗清楚先好收養呀！
香港最佳動物領養場所
1. 救狗之家 (HKDR)
救狗之家係一間致力為被遺棄嘅小狗尋找新屋企嘅救援同領養中心。佢哋堅持唔會進行人道毀滅，而且會為狗狗嚴格挑選新主人。想成為狗主嘅各位都先要填寫問卷，再經過救狗之家嘅徹底審查，先可以正式收養狗狗。帶新寵返屋企之前，新主人亦都要提交一筆領養費，為動物植入晶片同埋接種疫苗。救狗之家嘅體貼同可靠，令我哋覺得呢個組織絕對係香港領養動物最理想嘅場所之一。
救狗之家 (Hong Kong Dog Rescue) 喺鴨脷洲同大埔都設有領養中心
2. Kirsten’s Zoo
Kirsten’s Zoo 係香港一個非牟利組織，專門照顧一啲被遺棄或者受虐待嘅貓狗，並且幫佢哋尋找新嘅安樂窩。每隻動物進入 Kirsten’s Zoo 嘅時候，中心會確保已經絕育或者為佢哋進行絕育手術，仲會幫佢哋打好曬針、植入晶片、除蚤同驅蟲添。不過，因為 Kirsten’s Zoo 並冇常駐嘅庇護場所，所以若果你希望同小毛孩見見面或者申請領養嘅話，記得唔好錯過中心每月舉辦嘅兩次領養日（一日俾貓貓，一日俾狗狗）。另外，如果你想出一分力，但係又未確定自己想照顧邊一種動物嘅話，你可以註冊成為寄養家庭，為動物提供一個臨時嘅住所。
Kirsten’s Zoo，電話：5595 1933
3. 香港愛護動物協會 (SPCA)
喺1903年成立嘅 SPCA，過去百年以來一直為動物提供最適合同長久嘅家，保護佢哋免受遺棄或被虐待。另外，愛護動物協會唔單止救助貓狗㗎～ 比如若果你正喺度搵緊適合香港蝸居嘅小動物嘅話，SPCA 都有倉鼠可以收養。只不過，領養過程一啲都唔簡單㗎！有興趣收養動物嘅人一定要先註冊做 SPCA 嘅會員，而且花啲時間同動物互動，協會先至會俾動物同新主人返屋企。
愛護動物協會 (SPCA) 喺香港各區都設有領養中心同獸醫醫療中心
4. 香港動物基金 (Hong Kong Paws Foundation)
想喺香港領養動物？去香港動物基金拯救一隻小毛孩返屋企啦！呢個動物救援組織同本地嘅各個收容所都有密切合作，為貓狗提供佢哋所需嘅照顧。而各位熱心嘅義工人員亦都會出盡全力，確保每隻動物都搵到一個真正充滿愛嘅新家庭。如果你想睇吓香港動物基金目前有咩動物開放被人領養，可以關注佢哋嘅 Facebook 專頁。
香港動物基金 (Hong Kong Paws Foundation)，電話：9485 5188
5. Catherine’s Puppies
雖然 Catherine’s Puppies 規模唔算大，但係呢間位於西貢嘅狗狗收容所真係好有愛心㗎。中心嘅人員都會盡力為被遺棄嘅狗隻搵新嘅居所。有興趣領養狗狗嘅大家可以參加 Catherine’s Puppies 嘅 Puppy Booth 活動，親自同超級可愛嘅小狗互動，甚至帶返屋企！
Catherine’s Puppies，電話：6799 7530
6. 保護動物慈善協會 (LAP)
想要俾毛茸茸嘅小貓一個安樂窩嘅你，可以去 LAP 領養喔。佢哋嘅網站有齊關於領養寵物嘅各樣資訊，對於新手主人嚟講，特別實用！大家仲可以喺預約參觀協會之前，喺網站上面首先一覽所有目前被開放領養嘅小動物。不過，喺可以帶新寵返屋企之前，各位主人都要填寫一份廣泛嘅申請領養表格，絕對唔馬虎㗎。
保護動物慈善協會 (LAP)，電話：6344 8110
7. Hong Kong Cats
如果你係希望領養貓貓嘅話，Hong Kong Cats 會係你嘅不二之選。呢間非牟利組織專門幫貓貓尋找新家庭，而且喺小毛孩等緊人收養嘅時候，中心都會先為佢哋做曬所有必要嘅檢查同提供醫療服務，包括進行絕育手術、植入晶片、杜蟲等等，仲會幫佢哋沖涼同梳理好毛髮添 — 就係差你嚟接佢哋返屋企，鍚佢哋一世咋！
Hong Kong Cats，西貢躉場路，電話：5131 3921
